Dy persona mbetën të vrarë në sulmin e djeshëm që ndodhi në qytetin gjerman Halle. Sulmuesi i identifikuar si Stefan B (në gjuhën gjerman Stefan Balit, 27-vjeç, siç raporton Bild), kishte shtënë para një sinagoge në atë qytet, duke qëlluar një grua dhe pak metra më larg edhe një burrë.
Megjithatë pas intervenimit të forcave të shumta të policisë, është arrestuar sulmuesi i cili ka mundur të qëllojë mbi 70 besimtarë hebrenj që ishin brenda sinagogës, transmeton Telegrafi.
Sulmuesi ishte veshur me rroba të ushtrisë kishte edhe antiplumb dhe planifikonte të mbytë 70 besimtarët që ishin brenda sinagogës, por pasi që planet nuk i shkuan siç i kishte menduar, qëlloi dy persona në rrugë.
Ai kishte planifikuar në detaje sulmin, e cak i tij ishte sinagoga në Paulusvirtel në Halle, në të cilën kryejnë ritet fetare hebrenjtë. I armatosur me pushkë, ishte nisur në sulm të cilin e transmetoi live me kamerën GoPro që e kishte vendosur në helmetë.
Me të mbërritur në vendin e planifikuar filloi të transmetoj live gjithçka, derisa zyrtarët gjermanë kanë konfirmuar se sulmuesi ka qenë i motivuar nga ideologjia e ekstremit të djathtë.
Ai fillimisht kishte hedhur një mjet shpërthyes në varrezat e hebrenjve që për fat të mirë nuk kishte shpërthyer, ku më pas i është drejtuar sinagogës, duke tentuar të futet brenda dhe të shtie mbi masën që ishte aty.
E besimtarët që në ato momente ishin brenda mbyllën dyert e sinagogës, e përmes kamerave të sigurisë po vëzhgonin se si sulmuesi po mundohej të futej brenda.
Për fat të mirë dyert i kishin rezistuar forcë së tij, e i dyshuari nga inati qëlloi gruan që në ato momente ishte në hyrje të varrezave. Më pas është rikthyer në veturë duke shkuar deri në afërsi të një qebaptore.
Aty kishte qëlluar një burrë dhe ishte larguar duke e parë se nuk i shkrepte më pushka. Por, pas intervenimit të shpejtë të policisë është detyruar të tentoj të arratiset. Pas më shumë se 30 minutave ka mbërritur në Landsberg, ku ka tentuar ta vjedh një veturë tjetër, duke ia drejtuar revolen një burrë që i është kundërvënë.
Megjithatë ai arriti ta vjedh një taksi të parkuar me të cilin tentoi të dalë në autostradë, por për shkak të vozitjes së pakontrolluar është përplasur me një kamion. Aty policia e arrestoi. /Telegrafi/