Kryeekonomisti i bankës pjesërisht shtetërore LBBW në shtetin jugperëndimor të Gjermanisë Baden-Wurttemberg njoftoi se Gjermania po zhvillon negociata sekrete me Republikën Islamike të Iranit për blerjen e naftës iraniane.
“Negociatat intensive po zhvillohen tashmë në prapaskenë me Venezuelën, Iranin ose Algjerinë për të mbuluar nevojat e Gjermanisë për naftë dhe benzinë”, tha Moritz Kraemer, kryeekonomist i Landesbank Baden-Wurttemberg (LBBW).
Komenti i Kraemer u bë në kontekstin e pyetjeve se si Gjermania do të mbulojë nevojat e saj energjetike në dritën e përpjekjeve të vendit për të hequr qafe varësinë e saj nga gazi rus, shkruan jerusalempost.
Bernd Wagner, një zëdhënës i LBBW, i tha Postit se “në parim, LBBW nuk kryen asnjë biznes në lidhje me Iranin”.
I pyetur për deklaratën e Kraemer për bisedimet sekrete me regjimin iranian, Wagner tha se “Duket se ka një keqkuptim. Kryeekonomisti po flet për ekonominë kombëtare, jo për biznesin e LBBW. Kemi një dallim shumë të qartë këtu”.
Është e paqartë se si Gjermania do të blejë gaz nga Irani në këtë kohë për shkak të sanksioneve të SHBA-së në sektorin energjetik të Iranit.
Qeveria gjermane ndoshta parashikon se fuqitë botërore do të arrijnë një marrëveshje bërthamore me Iranin. Marrëveshja bërthamore do të heqë sanksionet ndaj sektorit energjetik të Iranit. /Telegrafi/