Gjashtë asamblistë nga Cyrihu e kanë përcjell nga afër si mysafirë seancën e Kuvendit të Kosovës të enjten.
Kryeparlamentari Glauk Konjufca teksa iu uroi mirëseardhje, tha se tre prej tyre janë shqiptarë.
E ligjvënësit e Kosovës u ngritën në këmbë dhe i përshëndetën me duartrokitje.
Në këtë seancë janë duke u votuar pikat e mbetura nga seancat e kaluara.
Pa votat e PDK-së dhe AAK-së, ka kaluar në lexim të dytë i Projektligji për ndryshimin dhe plotësimin e Ligjit për trajtimin e ndërtimeve pa leje. Miratimi i Ligjit u bë me votat e Lidhjes Demokratike të Kosovës, ndërkaq tre deputetë të Lëvizjes Vetëvendosje nuk kanë marrë pjesë në votim.
Gjithashtu, janë miratuar rekomandimet lidhur me raportin e auditimit të performancës menaxhimi i projektit “Bashkimi i qytetit të Ferizajt”. Partia Demokratike e Kosovës dhe Aleanca për Ardhmërinë e Kosovës nuk kanë marrë pjesë në votim.
Më pas, deputetët e PDK-së janë larguar nga salla. /Telegrafi/