174 kompani do të marrin pjesë në Panairin “Prishtina 2018”, prej të cilave 70 janë kompani nga Serbia dhe veriu i Kosovës, ndërsa vetëm një nga Shqipëria.
Duke komentuar diferencën drastike të kompanive të Serbisë dhe atyre të Shqipërisë që do të marrin pjesë në këtë panair, kryetari i Odës Ekonomike të Kosovës, Safet Gërxhaliu, tha se një gjë e tillë është dëshmi e humbjes së besimit në mes të Kosovës dhe Shqipërisë.
“Është më se e vërtetë që bashkëpunimi ekonomik mes Kosovës dhe Shqipërisë është kah përcillet më tepër me një patriotizëm folklorik të së kaluarës. Është humb besimi në mes të Kosovës dhe Shqipërisë për fat të keq dhe definitivisht nga një numër i tillë, duhet vërtet që të gjithë të ndalemi dhe të mendojmë se çfarë vërtet është duke ndodhur në aspektin ekonomik në mes Kosovës dhe Shqipërisë. Duhet të kuptohet edhe një gjë tjetër, kur dy vetë luftojnë i treti fiton. Në këtë mos angazhim për të avancuar bashkëpunimin ekonomik midis Kosovës dhe Shqipërisë, që nuk jemi ekonomi konkurruese, jemi shumë më tepër komplementare, po jetë hapësirë për depërtim të vendeve të treta dhe një gjë e tillë nuk duhet të na habisë”, u shpreh Gërxhaliu.
Sipas tij, Kosova dhe Shqipëria po garojnë se cila po vendos më tepër barriera. Ai apeloi dy qeveritë, atë të Kosovës dhe të Shqipërisë që të avancojnë bashkëpunimin ekonomik përmes thellimit të marrëdhënieve në këtë aspekt.
“Nuk është vetëm ky rasti i këtij panairi. Viteve të fundit problemet më të mëdha i kemi që është e pamundur të motivohen kompanitë e Shqipërisë për të qenë pjesë në panairet e Kosovës. Si duket ata janë më të gatshëm të bashkëpunojnë me këdo tjetër, por jo me Kosovën dhe e tëra kjo duhet të jetë një mesazh edhe për qarqet politike, që në mbledhjet mes qeverive në këto takime të kenë substancë. Dhe substanca kryesore të jetë vërtetë avancimi i bashkëpunimit ekonomik. Jemi shumë afër, shumë larg me Shqipërinë dhe si duket gara më e madhe është duke u bërë për të krijuar barriera dhe jo për t’u eliminuar këto barriera. Si pasojë janë edhe këto pasoja ekonomike që nuk ka besueshmëri dhe nuk ka gatishmëri për të qenë në tregun e Kosovës”, tha ai.
Krejt në fund, Gërxhaliu theksoi se duhet pragmatizëm dhe aktivizim i aktiviteteve në mes të dy vendeve, duke u liruar njëherë e mirë nga patriotizmi folklorik, pasi që dy shtete të një populli të ndarë është bashkëpunimi ekonomik ai që i afron. /KP /Telegrafi/