Lënda e dërguar nga ish-kandidati për kryeta të Prishtinës, Arban Abrashi për zgjedhjet në kryeqytet, pritet të marrë një epitet ditëve në vazhdim.
Kështu kishte konfirmuar ditë më parë për Telegrafin, zëdhënësi i Gjykatës Kushtetuese, Veton Dula.
Por vendimin e Gjykatës Kushtetuese po e cilëson si pazar, ish-këshilltari i Isa Mustafës dhe anëtari i LDK-së, Bajram Gecaj.
Në një postim në rrjetin social Facebook, Gecaj ka thënë se pas miratimit të buxhetit dhe Ligjit të dialogut, Kushtetuesja do të vendos në favor të Shpend Ahmetit, transmeton Telegrafi.
“Tani, pasi që buxheti e ligji për dialogun kaluan, i vjen radha e shpërblimeve apo trofeut real (për PSD-në), përkatësisht Prishtina! Pas më shumë se 10 muajsh pritjeje, tash shpejt, sipas marrëveshjes tanimë të përfolur nëpër medie, Gjykata Kushtetuese pritet të publikon vendimin në favor të Shpendit”, ka shkruar Gecaj.
Ai ka ironizuar duke e cilësuar qeverinë Haradinaj, si qeveri të vendimeve të mëdha.
“E pastaj, mos e akuzoini BE-në e mos u befasoni fare për raport progresi negativ, mos-liberalizimin e vizave, ikje të rinisë, ose edhe nëse kjo çështje ndodhë të diskutohet në Parlamentin Evropian. Avash avash, me rëndësi që Qeveria e “vendimeve të mëdha” të vazhdojë, ndërsa Kosova të del ku të del!”, përfundon postimi i Bajram Gecajt.
Ndryshe, Arban Abrashi vazhdimisht kishte pretenduar se ka pasur keqpërdorime në zgjedhjet lokale në kryeqytet.
Këto pretendime i kishte hedhur poshtë fillimisht Paneli Zgjedhor për Ankesa dhe Parashtresa, e pastaj edhe Gjykata Supreme. /Telegrafi/