Drejtori i Milanit, Ivan Gazidis, ka thënë se e ardhmja e Gennaro Gattusos pritet të vendoset shumë shpejt, pasi sot përfundoi sezoni 2018/2019 i Serie A.
Rossonerët e mposhtën i SPAL-in (3-2) në ndeshjen e fundit për këtë sezon, por dështuan të kualifikoheshin në Ligën e Kampionëve, ndërsa në edicionin e ri do të luajnë në Ligën e Evropës.
Gazidis ka thënë se ata e fituan ndeshjen e fundit, mirëpo janë të pikëlluar që nuk u kualifikuan në garën më të madhe për klube në Evropë.
“Ne jemi mjaft të zhgënjyer që nuk kemi arritur të kualifikohemi në Ligën e Kampionëve”, ka thënë drejtori gjeneral i Milanit pas ndeshjes.
“Megjithatë, ekipi luftoi fort deri në fund dhe unë dua t’i falënderoj të gjithë për përpjekjet e tyre, duke tejkaluar vështirësitë e përfaqësuara nga lëndime të ndryshme dhe disa pengesa”.
“Ne përfunduam sezonin me pikët tona më të larta që prej 2012/2013. Sezonin e ardhshëm do të marrim pjesë në Ligën e Evropës për të dytin vit radhazi”.
“Jam i bindur se ekipi do të vazhdojë të rritet dhe të arrijë sukses. Unë u impresionova vërtet nga mbështetja e jashtëzakonshme e të gjithë tifozëve tanë gjatë gjithë sezonit. Ata ishin vazhdimisht pozitivë dhe përkrahës të ekipit, edhe në momentet më të vështira, duke na ngritur çdo herë. Unë dua t’i falënderoj të gjithë”.
“Gattuso? Ne do të bisedojmë në ditët e ardhshme për të kryer një analizë të plotë të sezonit dhe të shikojmë hapat e ardhshëm për të vazhduar rritjen e klubit”, ka shtuar më tej Gazidis. /Telegrafi/