Komisioni Europian (KE), ka përgatitur draftin ligjor të mekanizmit të vetëm të garancisë për depozitat bankare brenda Eurozonës. Kjo iniciativë që do marrë edhe pëlqimin e parlamentit europian pritet të haset me kritika të shumta nga qeveritë e vendeve anëtare.
Garancia e depozitave bankare është pikërisht themeli që i mungon unionit bankar. Ky i fundit është edhe objektivi i radhës i zonës së monedhës së përbashkët, duke qënë se mungesa e tij cenon stabilitetin financiar të rajonit.
Unioni Bankar bazohet te një mbikëqyrje e vetme ndaj kreditimit një fond të përbashkët për zgjidhjen e problemeve, si dhe një organizëm të ri për zgjidhjen e krizave. Objektivat kryesorë janë; shkombëtarizimi i mbikëqyrjes bankare, thyerja e lidhjes mes institucioneve bankare dhe borxhit kombëtar, përmirësimi i sistemit financiar europian, si dhe forcimi i unionit monetar.
Aktualisht, çdo vend i unionit ka një mekanizëm të vetin për të garantuar depozitat bankare. Gjatë viteve të fundit, legjislacionet e vendeve anëtare në këtë drejtim janë harmonizuar nën direktivat e Komisionit europian.
Në rast krize, garantohen vetëm depozitat deri në 100 mijë euro, dhe rimbursimi mund të bëhet vetëm brenda 10 ditëve. Një mekanizëm i vetëm europian do të thjeshtonte edhe më shumë punën e institucioneve në këtë drejtim. Mekanizmi do të bazohet në tre faza; risigurimi, bashkë-sigurimi dhe në fund sigurimi i plotë, që do të kthehet në realitet pas vitit 2024. /Telegrafi/