Shefi i Grupit Parlamentar të Lidhjes Demokratike të Kosovës (LDK), Arben Gashi ka thënë se si grup do ta përkrahin Projektligjin për Rimëkëmbjen Ekonomike, në mënyrë që qytetarët të marrin përkrahjen ekonomike të shumëpritur.
Gashi gjatë seancës së sotme në Kuvendin e Kosovës ku pritet të votohet për Projektligjin për Rimëkëmbjen Ekonomike tha se në momente kritike për vendin partitë politike duhet të bëhen bashkë dhe t’i kalojnë proceset përpara.
“Në momente kritike për vendin jemi bo bashkë dhe duhet me u bo bashkë, e jo me u fsheh atje në një skutë dhe me pretendu popullin autentik- imagjinar duke pretenduar se ndoshta një ditë ky popull do të nxjerr liderin e pakontestueshëm në krye të proceseve. Në njerëzit e zakonshëm bëhemi bashkë për interesa të vendit, për interesa të vendit ndoshta do të bëhemi bashkë prapë në të ardhmen. Në politikë koncepti ‘kurrë’ nuk ekziston. Ideja përjashtimore ‘le të kallet vendi se ne nuk duhet të bëhemi bashkë’ nuk duhet të ekzistoj për ne dhe nuk duhet të ekzistoj dhe për ju, andaj në këtë seancë ne e përkrahim dhe do t’i kemi votat tona që qytetarët e Kosovë ta marrin përkrahjen ekonomike dhe fiskale të shumë pritur”, ka thënë Gashi. /Telegrafi/
