Shefi i Grupit Parlamentar të Lidhjes Demokratike të Kosovës, Arben Gashi ka thënë se kryeministri i vendit, Avdullah Hoti ka legjitimitet të plotë dhe nuk ka ndarje të Kosovës, ndërkaq sipas tij të tjerat janë vetëm deklarata për konsull politik.
Gashi tha po ashtu se rreziku i thikave mbi harta nuk ka ekzistuar asnjëherë, por edhe nëse ka ekzistuar, atëherë Hoti e ka mënjanuar atë.
“Hoti ka legjitimitet të plotë dhe nuk ka ndarje të Kosovës, këto janë fakte dhe të tjerat janë vetëm deklarata për konsum politik. Qytetarët janë lodhur me fjalime e poza patriotike, njerëzit duan punë, siguri. Prej se është zgjedhur është akuzuar se roli i tij në Washington do të ishte një asistent i Thaçit. Rreziku i thikave mbi harta nuk ka ekzistuar asnjëherë, nëse ka ekzistuar atëherë kryeministri Hoti e ka mënjanuar”, ka thënë Gashi.
Ai tha se përdorimi i përbashkët i Liqenit të Ujmanit nuk nënkupton pronësi të përbashkët me Serbinë.
“Ujmani territorialisht gjendet në pjesën më të madhe në Kosovë dhe që është pasuri e Kosovës, duhet insistuar që në studimin e fizibilitetit të theksohet kjo, përdorimi i përbashkët nuk nënkupton pronësi të përbashkët. Sa i përket minishengenit ne do të insistojmë që në këtë zonë Kosova të hyjë si shtet si palë e barabartë, ne duhet të shohim se cilat janë avantazhet tona në zhvillimin ekonomik dhe unë jam shumë i sigurt që kryeministri Hoti është njeriu kompetent për t’u marrë me këtë punë”, ka thënë Gashi. /Telegrafi/
