Colorado Rapids ka pësuar humbje në ndeshjen e parë finale të Konferencës së Perëndimit në play off-in e kampionatit amerikan të futbollit.
Takimi i zhvilluar si mysafir i Seattle Sounders përfundoi me fitoren 2-1 të vendasve.
Shkëlzen Gashi u aktivizua nga minuta e parë në këtë takim, por u zëvendësua në minutën e 78 të ndeshjes. Ai nuk arriti të ndihmonte dot ekipin e tij të shmangte humbjen.
Colorado kaloi i pari në avantazh në minutën e 13 me anë të Doyle, por Morris në minutën e 17 dhe Lodeiro në minutën e 61-të me penallti përmbysën shifrat.
Pavarësisht humbjes, Colorado është ende në garë për t’u shpallur kampion në Konferencën e Perëndimit, duke qenë se në ndeshjen e kthimit në fushën e tij i mjafton një fitore 1-0.
Në rast të shpalljes kampion në Konferencë, Colorado kualifikohet edhe për në finalen e madhe të play off-it të kampionatit amerikan ku ndeshen kampionët e dy konferencave.