Ish-deputeti i Kuvendit të Kosovë, Gani Geci, ka njoftuar se me të hyrë në Maqedoni është alarmuar Shërbimi Informativ i këtij vendi.
Sipas tij, policia kufitare e Maqedonisë është e obliguar ta njoftojë Shërbimin Informativë sa herë që ai futet në Maqedoni.
“Siç mora vesh policia kufitare Maqedonase është e detyruar ta njoftoj Shërbimin Informativ të Maqedonisë për çdo hyrje timen ne Republikën e Maqedonisë. Ka me shumë se 15 vite qe nuk kam qenë në Republikën Maqedonisë, por e kuptova se qëndrimi im në Maqedoni është i vëzhguar sigurisht për arsye te qëndrimit tim politikë nacional, sepse në Republikën e Maqedonisë asnjëherë as për ngasje të shpejtë nuk kam rënë ndesh me Ligjet e Maqedonisë”, ka thënë Geci.
Geci u ka bërë thirrje autoriteteve kosovare që të mbrojnë të drejtat e qytetarëve ndaj shteteve tjera.
“Unë Gani Geci si ish-deputet i Republikës së Kosovës kërkoj nga institucionet relevante të Republikës se Kosovës që të përkujdesen për qytetaret e vet që udhëtojnë në Republikën e Maqedonisë dhe të kërkojnë nga institucionet e Republikës se Maqedonisë që të heqin nga vëzhgimi emrat që nuk kanë rënë ndesh me ligjet e Maqedonisë dhe nuk cenojnë integritetin territorial të Republikës së Maqedonisë”, ka shkruar Geci në Facebook. /Telegrafi/
