Gra të moshuara dhe fëmijë të vegjël, janë në mesin e refugjatëve që kanë arritur në Bangladesh, pasi kanë ikur nga dhuna që po ushtrohet mbi komunitetin mysliman në Rakhine të Myanmarit.
Deri më tani, zyrtarisht kanë ikur 125 mijë njerëz nga terrori dhe vrasjet masive, por dyshohet se ky numër është tri herë më i lartë, transmeton Telegrafi.
Për vite me radhë, 1.1 milionë pjestarë të këtij komuniteti, nuk i është njohur shtetësia, andaj nuk mund të shkolloheshin dhe të punonin.
Zyrtarë të Kombeve të Bashkuara, kanë kërkuar që të ndalohet dhuna dhe spastrimi etnik, por ende nuk është bërë asgjë në këtë aspekt.
Laureatja e Çmimit Nobel që është në krye të qeverisë, Aung San Suu Kyi ka anuluar vizitën në Asamblenë e Përgjithshme të Kombeve të Bashkuara, me arsyetimin është duke e trajtuar krizën. /Telegrafi/
