Elita jonë politike, ka frikë nga lideri i Lëvizjes Vetëvendosje, politikani i ardhshëm Albin Kurti, ngase ky mendoi ndryshe, kundërshtoi Pakon e Martti Ahtisaarit, decentralizimin…. Procesi i përsëritur ndaj tij nuk është i rastësishëm.
Edhe kësaj radhë, më 23 shkurt, dështoi procesi. Nuk u paraqit në gjykatore i akuzuari Albin Kurti, as anëtarja e trupit gjykues Fllanza Kadiu. Seanca shtyhet për 2 mars. Qëndrimi i Kurtit ndaj EULEX-it dihet: "Nuk e njihni pavarësinë e vendit tim, as unë nuk u njoh juve".
Ishte koincidencë, apo jo. Po atë ditë, kur u shtye seanca, gazetat botuan në faqen e parë foton e Albinit, treguan për të se pritet të formojë partinë e re, të angazhohet në politikë.
Shtëpinë e drejtësisë e kishin pushtuar gazetarët, kameramanët… Ishte një numër i vogël i pjesëmarrësve të "spektaklit" ! Kalimtarët nuk e kthenin kokën, ata që e kthenin pëshpëritnin: "Kush po gjykohet…". Herë pas here vinin makinat e policisë, policët bllokonin trafikun.
Tek porta e gjykatores qëndronin policët, dy zonja, njëra e EULEX-it, dhe një zotëri. I "preknin" gazetarët, shikonin mos kanë ndonjë gjësend të metaltë, apo mjet të incizimit. Para se të nisë "zhurnali", pjesëtarët e policisë i ftuan dy aktivistët e Vetëvendosjes ! Glauk Konjufcën dhe Zgjim Hysenin të lëshojnë sallën e gjykimit, ngase kanë punë me ta. Në publik u dëgjuan zërat:"I arrestuan Glaukun e Zgjimin…". Fotoreporterët e kameramanët e "zunë" skenën e këtyre dy "pacientëve", të cilët i futën në makinën e policisë.
Me një vonesë prej gjysmë ore hynë me "xharra" gjykatësit e EULEX-it, Ferdinando Buatier de Mongeot dhe Vladimir Kanev. Afër tyre, njëri në të majtë e tjetri në të djathtë zunë vendet e tyre dy "civilë", prokurori special Ali Rexha dhe avokati, mbrojtësi ex officio Ramiz Krasniqi.
Zotëri Mongeot, i cili, me gjasë, nuk dinte se çka kishte ndodhur gjysmë ore më herët, i diktoi procesmbajtëses të shënoj praninë e palëve. Detyrë e mbrojtësit është të reagoj, t’i bëj me dije kryetarin e trupit gjykues, zotëri Mongeot për incidentin që kishte ndodhur, por ai nuk e bëri këtë. Ndoshta, nuk e ka ditur?!
Në publik gjendej avokati Tomë Gashi. Po e përmend Gashin për të treguar se para dy vjetësh nuk kishte pranuar të jetë mbrojtës ex officio i Albinit. "Kam respektuar Apelin e Albinit që asnjëri nga avokatët të ‘ mos duket ‘ në gjykatore", më tha ky avokat, derisa vazhdonte rrjedha e kësaj seance.
Gjykatësi shtatgjatë Mongeot arsyetoi mospraninë e koleges së tij Fllanza Kadiu. "Ajo ka probleme shëndetësore", tha ai. Pastaj shtoi:"Uroj të shërohet sa më shpejtë…".
Përkthyesja, një vashë e re, përktheu fjalët e gjykatësit Mongeot:"A gjenden në sallën e gjykimit vktimat, dëshmitarët e rastit penal… ? ". I përmendi emrat e tyre veç e veç, shumica prej të cilëve mungonin. Përmendi ai "viktimat", këtë term juridiko teknik, i cili përdoret në të drejtën e procedurës penale. Me të dëgjuar këtë shprehje, të pranishmit pëshpëritën:"Këqyre ti, këta qenkan viktimat e Albin Kurtit, ky u paska shkaktuar plagë…".
Së këtejmi, zotëri Mongeot foli për fletarrestimin ndaj Albin Kurtit. "Urdhri për arrestimin e të akuzuarit Albin Kurti nuk vlen sot, por më 2 mars, ditën e seancës", saktësoi ai.
Mbrojtësi ex officio Ramiz Krasniqi dukej i shqetësuar, mezi i zihej vendi vend. Ai tërhoqi vëmendjen se kjo është hera e fundit që ka ardhur në gjykatore për rastin e Albinit. Për këtë punë mos më thirrni më, tha ai duke shtuar se i "bartë të gjitha konsekuencat ligjore". Krasniqi theksoi:"Unë s’mund të veproj në kundërshtim me ndërgjegjen, bindjet e mia. Ju lus që të pranoni dorëheqjen time…". Përgjigja e gjykatësit ishte:"Refuzohet kërkesa e mbrojtësit…". Mongeot e ftoi në zyrën e tij këtë mbrojtës, i tha:"Eja në zyrën time, bisedojmë nja dy minuta…".
Me të përfunduar seanca, vazhdoi "zhurnali" tjetër përballë Gjykatës. Gazetarët morën deklarata nga zëdhënësja e EULEX-it, Christina Herodes, avokati Ramiz Krasniqi dhe aktivisti i Vetëvendosjes ! Visar Ymeri. Znj. Herodes theksoi se nuk e di arsyen e arrestimit të dy aktivistëve të Vetëvendosjes ! Glauk Konjufca e Zgjim Hysenit. "Pyetni për ta në polici", iu tha gazetarëve. Një njërën nga pyetjet se çfarë pasoja mund të ketë në rast të mosparaqitjes së tij në gjykatore, më 2 mars, avokati Krasniqi tha: Gjyqi mund të më gjobis me 250 euro, të merre licencën …
Zotëri Krasniqi mos keni frikë, EULEX-i as nuk jep e as nuk merr licenca!
Kjo çka po ngjet me ne, Albin Kurtin e të tjerët, është një fushatë me prapavijë politike, tha Visari. Në pyetjen time konkrete se a e kanë kërkuar policia sot Albinin në banesën e tij dhe në selinë e Vetëvendosjes ! – përgjigja e tij rezultoi:"Nuk kam informacione për këtë", tha ai.
Në selinë e Vetëvendosjes ! Frashër Krasniqi njoftoi për arrestimin e aktivistit tjetër në Podujevë, Blerim Maqestenën. "Blerimin e arrestoi policia derisa ai kujdesej për Peticionin, nënshkrimet e qytetarëve përkitazi me lirimin e Albinit". Frashëri përmendi Telegrafin. Këtu, tha ai, e kam lexuar shkrimin tuaj që ka të bëjë me Albinin – Ndiqet viktima, shpërblehen vrasësit ! "Të rinjtë po e lexojnë Telegrafin…", tha ai.
Procesi, në fazën e hetimeve ndaj Nazim Bllacës, të vetëshpallurit vrasës, sikur ka është zbehë. Ky i pandehur "ra nga liga", s’bëhet zhurmë për të, mbahet i ngujuar në shtëpi. Ndërkaq, zyrtarët e EULEX-it aktivizuan fletarrestimin ndaj Albinit, kërkojnë ta arrestojnë duke e cilësuar "të rrezikshëm" ! Në anën e Albinit doli të jetë edhe diplomati Joe Higgins, anëtar i Parlamentit të BE-së, i cili ka dërguar një letër përkrahje për Kurtin duke e cilësuar procesin gjyqësor të motivuar politikisht.
Kambana bie për atë që ka vesh!