Fondacioni privat i njeriut më të pasur në botë nuk arriti të dhurojë shumën e kërkuar me ligj për të tretin vit radhazi.
Sipas të ashtuquajturës “rregulla e pesë përqindëshit,” fondacionet private janë të detyruara me ligj të drejtojnë të paktën pesë për qind të aseteve të tyre drejt kauzave bamirëse.
Fondacioni i Elon Muskut është ndër më të mëdhatë e këtij lloji, me një kapital prej 9 miliardë dollarësh, duke përfshirë miliona aksione të kompanisë së automjeteve elektrike Tesla, në pronësi të Muskut.
Por gazeta The New York Times raportoi se “Fondacioni Musk” kishte një deficit prej 421 milionë dollarësh nga përmbushja e rregullës së pesë përqindëshit në vitin 2023, duke e bërë këtë vitin e tretë radhazi që nuk e arrin objektivin. Fondacioni kishte një deficit prej 234 milionë dollarësh në 2022 dhe 41 milionë dollarësh në 2021, por më vonë e mbuloi këtë mungesë për të shmangur një taksë ndëshkuese.
Në kontrast me fondacionet e tjera të filantropëve të pasur, të cilat zakonisht fokusohen në kauza të gjera shoqërore dhe për të mirën publike, fondacioni privat i Muskut është disi jo konvencional, duke u fokusuar në shërbimin e interesave të themeluesit të tij. Ky fondacion nuk ka staf të punësuar dhe drejtohet nga një bord tre-anëtarësh vullnetar, ku përfshihet vetë Musk.
Siç raportoi The New York Times në muajin mars, Fondacioni Musk ka vepruar në mënyrë të çrregullt dhe kryesisht për interesa vetjake, duke i mundësuar Musk përfitime të mëdha tatimore dhe ndihmuar bizneset e tij. Në vitet 2021 dhe 2022, rreth gjysma e donacioneve të fondacionit kishin lidhje në një farë mënyre me vetë miliarderin, bizneset ose punonjësit e tij, sipas raportit të gazetës.
Për mosarritjen e minimumit ligjor, fondacioni “mund të shpërndajë më shumë vitin e ardhshëm për të kompensuar”- ose të paguajë një gjobë të rëndë ndaj IRS-it.
Por, Musk kohët e fundit ka sugjeruar se IRS-i (Shërbimi i të Ardhurave të Brendshme) mund të jetë në shënjestër për t’u shfuqizuar në kuadër të Departamentit të Propozuar të Efiçencës Qeveritare (DOGE) nga administrata e presidentit të ri amerikan, Donald Trump.
“IRS sapo tha se dëshiron 20 miliardë dollarë më shumë”, shkroi Musk në platformën X muajin e kaluar, duke i pyetur përdoruesit nëse buxheti i tij duhet “rritur,” “mbetur njësoj,” “ulur,” apo “fshirë.”
Opsioni i fundit fitoi me 60 për qind të votave të përdoruesve. /Telegrafi/