Në marrëveshjen e nënshkruar mes Kosovës dhe Serbisë më katër shtator në Uashington, një nga pikat është edhe përdorimi i përbashkët i Ujmanit. Për këtë çështje ditë më parë është mbajtur edhe takimi i Grupit Punues për Studimin e Fizibilitetit të këtij liqeni, mirëpo ekspertët ujorë kanë kritika për këtë.
Të dielën është mbajtur takimi i parë i Grupit Punues për studimin e fizibilitetit për Liqenin e Ujmanit.
Por njëri ndër inxhinierët që projektoi Ujmanin, Avdi Gjonbalaj, po kritikon nismën e Kosovës që me Serbinë të diskutojë për Ujmanin e t’i bëhet përsëri fizibiliteti, ngase ky studim sipas tij është bërë nga Banka Botërore në vitin 1971.
“Në vitin 1971 Ujmanit i është bërë studimi i fizibilitetit nga Banka Ndërkombëtare. Nuk ka mbetur asgjë pa u shpjeguar. Studimi i bërë ekziston dhe si i tillë është në gjuhën angleze dhe serbo-kroate dhe mund ta sheh kush të dojë”, deklaroi Avdi Gjonbalaj për RTV Dukagjinin.
Madje eksperti i ujërave po shprehet se ekipi i Kosovës nuk ka njohuritë e duhura për Ujmanin.
“Zyrtarët shtetërore qoftë të nivel qendrorë apo lokal nuk kanë fare njohuri për ndarjen e ujrave dhe të drejtës ndërkombëtare”, deklaroi më tej Avdi Gjonbalaj, përcjell Telegrafi.
Studimi i fizibilitetit për Ujmanin, bazuar në marrëveshjen e Uashingtonit, do të kryhet nga ekspertë amerikanë të Departamentit të Energjisë, si furnizues i sigurt i ujit dhe energjisë./RTV Dukagjini/Telegrafi/