Pasi u largua nga Shtëpia e Bardhë, presidenti Donald Trump u tha gazetarëve se ishte një “nder i madh” të shërbente si Presidenti i 45-të i Shteteve të Bashkuara.
Sipas CNN, përcjell Telegrafi, ai tha se ka qenë “nderi i një jete të tërë” dhe se ai thjesht donte të kalonte dhe të thoshte lamtumirë.
Ai shtoi se shpresonte se nuk do të ishte një lamtumirë e gjatë, njoftoi Jeremy Diamond i CNN.
Ndërkohë siç raporton The Guardian, përcjell Telegrafi, familja e Donald Trump ishte në aeroportin ushtarak për largimin e presidentit Trump.
Po sipas The Guardian, Trump ftoi zonjën e parë në ikje Melania Trump për të thënë disa fjalë dhe më pas renditi një seri arritjesh që ai pretendoi për administratën e tij, duke përfshirë krijimin e Forcës Hapësinore të SHBA-së, uljen e taksave dhe “ndërtimin e ekonominë më të fuqishme që Shtetet e Bashkuara kanë parë ndonjëherë”.
Ai e përshkroi zhvillimin e një vaksine kundër coronavirusit në nëntë muaj si “një mrekulli mjekësore”.
Trump filloi të përfundojë fjalimin e tij duke thënë: “Ju jeni njerëz të mahnitshëm dhe ky është një vend i shkëlqyeshëm dhe është një nder dhe privilegj të kem qenë presidenti juaj”, ndërsa turma brohoriti “Faleminderit Trump”.
Ai premtoi se “do të vëzhgonte dhe dëgjonte”, se e ardhmja e vendit ishte e shkëlqyeshme dhe i uroi administratës së ardhshme sukses dhe fat, dhe tha se ai mendonte se ata do të ishin të suksesshëm.
Trump tha se ata kishin themelet për të bërë diçka vërtet spektakolare dhe se administrata e tij e kishte “vendosur atë në një pozitë ku nuk ka qenë kurrë më parë, pavarësisht se ishte goditur me murtajën më të rëndë që nga viti 1917”. /Telegrafi/