Hendbollistet e Universitetit të Prishtinës kanë shënuar fitore të thellë dhe të rëndësishme në ndeshje me ekipin universitar të Kroacisë, “University North”.
Të martën pasdite në Pallatin e Rinisë në Prishtinë, hendbollistet tona fituan me rezultatin 32-18. Ekipi ynë universitar ka dominuar plotësisht dhe si rezultat u shënua fitorja e lartë.
Pas pjesës së parë rezultati ishte 21-8 për Universitetin e Prishtinës. Motrat Elisa e Melisa Mulaj janë shquar me efikasitet. Elisa i realizoi nëntë gola, ndërsa Melisa i kishte shtatë.
Yllka Shatri shtoi tre gola, ndërsa nga dy i kishin Luljeta Sopjani, Natalija Milatoviq, Alma Nivokazi, Tina Hetemi e Ardiana Prapashtica. Melike Ipqi, Lorena Matarova e Adelina Berisha shënuan nga një gol.
Në fitore kontribuuan edhe portieret Blerta Ahmetxhekaj, Venera Kafexholli e Rinesa Uka.