Bayern Munich e ka nisur për mrekulli edicionin e ri në Bundesliga.
Kampioni në fuqi i Gjermanisë ka triumfuar me rezultat të thellë 8-0 në ndeshjen e parë ndaj Schalke 04.
Trajneri i Bayern Munich, Hansi Flick ka thënë se nuk e ka pritur një fitore të tillë, duke parë edhe emrin e kundërshtarit përballë dhe kohën e shkurtër për përgatitje.
“Të them të drejtën nuk e kisha menduar një rezultat të tillë duke parë edhe kundërshtarin që kishim përballë. Kishim shumë pak kohë në dispozicion për të përgatitur ndeshjen, por djemtë treguan se janë profesionistë të vërtetë. Forma e tyre ishte madhështore. Kam një skuadër që luan me intensitet dhe nuk e humbet në asnjë moment përqendrimin”, deklaroi Flick.
Trajneri gjerman tha se objektivat e Bayernit gjithmonë janë që ta fitojnë kampionatin dhe se kjo pyetje nuk duhet bërë kurrë.
“Objektivi mbetet i pandryshuar, të fitojmë kampionatin. Mendoj që kjo pyetje nuk ka më nevojë për përgjigje. Bayerni luan gjithmonë për të fituar dhe kjo është e qartë. Pas tripletës jemi akoma të uritur për më shumë sukses”, tha Flick.
Krejt në fund numri një i bavarezëve gjeti kohë edhe për t’i kritikuar lojtarët e tij, përkundër që fituan me tetë gola diferencë dhe nuk pësuan asnjë.
“Mënyra se si u përgatit ndeshja nga skuadra ishte ajo e duhura. Sigurisht që edhe pas një fitoreje të tillë ka vend për kritika”.
“Në disa momente lamë shumë hapësira prapa, duke u dhënë mundësi kundërshtarëve të rrezikonin. Jemi vetëm në fillim të sezonit dhe rruga deri në fund do të jetë e gjatë. Askush nuk fal asgjë në futboll dhe kjo është vërtetuar shumë herë”, përfundoi Flick. /Telegrafi/