Nga sot, duke nisur me dy prej zonave turistike në Ksamil dhe Velipojë, fillon operacioni i shembjes e ndërtimeve pa leje në bregdet.
Operacioni, i paralajmëruar nga autoritetet do të “rrëzojë sot” në zonën e Velipojës 15 objekte të ndërtuara pa leje në bregdet, ndërsa në Ksamil janë parashikuar rreth 30.
Pesë ditë më parë ishte kryeministri Edi Rama ai që u la afat pronarëve që kanë ndërtuar pa leje, deri sot, që t’i shembin vetë, pasi në të kundërtën, pasojat do të jetë më të rënda. Paralajmërimi shkoi për të gjithë, që nga investitorët deri tek punonjësit e kantiereve apo edhe shefat e policisë.
Ishte Inspektorati Kombëtar i Mbrojtjes së Territorit i cili përmes një njoftimi dje bëri me dije detajet e operacionit për ditën e sotme. Objektet që do të shemben në Ksamil dhe Velipojë variojnë nga 1 deri në 5 kate, me struktura beton-arme dhe të lehtësuara.
Janë 15 objekte që janë parashikuar që të prishen sot në Velipojë.
Deri tani nuk ka pasur asnjë kundërshti nga pronarët.
Ashtu siç ishte paralajmëruar në zonën e Ksamilit në Sarandë kanë filluar shembjet e ndërtimeve pa leje në zonën e bregut të detit. Fadromat e IKMT kanë filluar punën.
Pronarët janë ankuar dhe kanë kërkuar më shumë kohë që të mund të heqin materialet pasi sipas tyre nuk janë njoftuar më parë. /Report TV/
