Edicioni 2021/22 në futbollin kosovar është drejt fundit ku kanë mbetur vetëm edhe disa xhiro për të përfunduar BKT Superliga, Liga e Parë, Liga e Dytë dhe e tretë.
Kampioni i Kosovës tanimë dihet dhe është Ballkani, ndërsa dy skuadrat që rikthehen në BKT Superligë janë Trepça ’89 dhe Ferizaj.
Por ende ka mbetur të mësohet emri i skuadrës së tretë që do të futet në elitën e futbollit kosovar, me Lirinë dhe Vushtrrinë që do të luajnë në barazh, derisa fituesi i këtij dueli përballet me vendin e tetë që do të jetë në fund të Superligës.
Prishtina, Drenica, Malisheva dhe Dukagjini janë skuadrat që po luftojnë për t’iu shmangur pozitës që i dërgon në barazh.
Tanimë FFK ka caktuar edhe stadiumet ku do të zhvillohen ndeshjet e barazhit, dhe ato janë 18 Qershori në Klinë dhe Zahir Pajaziti në Podujevë.
“Janë caktuar datat dhe stadiumet në të cilat do të zhvillohen ndeshjet e barazhit për Superligë dhe Ligën e Parë”.
“Ndeshja e barazhit për Ligën e Parë do të zhvillohet më 21 maj, në stadiumin “18 Qershori” në Klinë, derisa ndeshja e barazhit për Superligë do të zhvillohet më 28 maj në stadiumin “Zahir Pajaziti” në Podujevë”, thuhet në njoftimin e FFK-së.
/Telegrafi/