Festimet në natën e ndërrimit të moteve ishin në përgjithësi të qeta. Kryesisht u festua me fishekzjarre. Sivjet gjatë festimeve pati më pak të lënduar.
Por, në disa raste këto festime eskaluan paksa, duke u përdorë edhe armët e zjarrit.
Në këto raste rreziku është goxha i madh, nga këto gjuajtje. Qarkullimi i plumbave “qorr”, mund të rrezikojë qytetarët edhe në shtëpitë e tyre.
E një nga ta ka depërtuar edhe në shtëpinë e familjes Mehmeti, në lagjen e Muhaxherëve. Klan Kosova ka kontaktuar me Valon Mehmetin.
Ai se plumbi është gjetur sot në mëngjes brenda shtëpisë.
“Sot në mëngjes duke kontrolluar në shtëpi, e kemi gjetur plumbin brenda. Dmth plumbi e ka thyer xhamin dhe plastikën e xhamit dhe ka depërtuar brenda. Të lënduar nuk ka, mirëpo ka mundur të jetë rrezik sepse aty është kuzhina, dhe gjatë festimeve ka pasur edhe fëmijë që kanë lëvizur andej”- tha Mehmeti.
Në jo pak raste si pasojë e plumbave “qorr”, shumë njerëz kanë përfunduar të lënduar, dhe gati çdo vit ka pasur edhe viktima.