Kryetari i LDK-së Isa Mustafa, nga tetë liderët politikë që kanë qenë pjesë e sondazhit, renditet i katërti duke tejkaluar presidentin Thaçi dhe liderët e koalicionit parazgjedhor PAN.
I pari i LDK-së befasisht ka një popullaritet të lartë në Ferizaj, edhe pse subjekti i tij politik në këtë komunë ndodhet në opozitë.
Sipas hulumtimit të Kantar TNS, Index Kosova, Mustafa vazhdon të ruaj popullaritet të mirë në Pejë, ndërsa më së paku figura e tij politike pëlqehet në Mitrovicë.
Është interesant fakti se Isa Mustafa pikën më të ulët të popullaritetit e ka pasur pikërisht në vitet kur ai ka pasur postin më të lartë politik në karrierë.
Ish-kryeministri Mustafa popullaritetin më të lartë e ka pasur në vitin 2010, vit kur ai edhe mori drejtimin e LDK-së.
Këto të dhëna janë publikuar nga Visar Berisha, menaxhues i projektit të Kantar TNS, Index Kosova në emisionin Debat Plus të RTV Dukagjinit. Hulumtimi është bërë nga viti 2003 deri në këtë vit dhe matja është bërë çdo gjashtë muaj.
