Feith gjatë vizitës disa orëshe është informuar në detaje rreth punës në mihje dhe gjenerim nga u.d. i Drejtorit Menaxhues të KEK-ut, Arben Gjukaj dhe menaxhmenti i lartë i mihjeve dhe termocentraleve.
Fillimisht i janë shpjeguar rezervat me linjit përmes hartave të punuara nga Divizioni për Prodhimin e Qymyrit, ku vetëm në Basenin e Kosovës janë mbi 10 miliardë tonë. Ai është informuar gjithashtu se KEK-u ka 17 ekskavatorë për nxjerrjen e thëngjillit dhe largimin e djerrinës, përderisa po punohet intenzivisht në hapjen e mihjes “Sibovci Jugpërendim”, rezervat e të cilës mjaftojnë për mbajtjen në punë të blloqeve ekzistuese të termocentraleve deri në fund të jetës së tyre teknologjike.
Interesimi i Feith është fokusuar edhe në çështjet e hirit, ku rikultivimi i deponive po bëhet me një donacion të Bankës Botërore dhe Qeverisë së Holandës e më pas ai ka parë për së afërmi punën në mihje dhe termocentrale.
“Fitova një pasqyrë të plotë rreth nxjerrjes së thëngjillit dhe prodhimit të energjisë elektrike. Ju djem po bëni një punë të shkëlqyeshme”, u ka thënë Feith punëtorëve të KEK-ut në mihje dhe gjenerim.
Feith ka shprehur gatishmërinë e plotë që të ndihmojë KEK-un në të gjitha çështjet që ai ka mundësi. /Telegrafi/