Federata Alpiniste e Kosovës, ka reaguar pas dëmtimit të shenjave sinjalistikës bjeshkatare.
Përmes një shkrimi në faqen e tyre zyrtare në Facebook, ata kanë publikuar fotografi të shenjave të dëmtuara dhe kanë ftuar organet e rendit që t’i ngrisin hetimet për t’i identifikuar përgjegjësit.
“Federata Bjeshkatare Alpiniste e Kosovës dënon aktet vandale të dëmtimit të shenjave të sinjalistikës bjeshkatare dhe fton organet e rendit që t’i ngrisin hetimet urgjentisht, zbulojnë keqdashësit dhe sjellin para ligjit të gjithë vandalët dhe përgjegjësit”, thuhet në reagim.
FBAK, thotë se për të ndërtuar shtigjet dhe sinjalizuesit, është punuar shumë andaj nuk duhet shkatërruar, pasi ato ndihmojnë shumë orientimin e njerëzve nëpër bjeshkë.
“Personat që shkatërrojnë mjedisin, sanksionohen penalisht sipas Kodit Penal të Kosovës. Komuniteti bjeshkatar alpinist i Kosovës ka punuar me vite për zhvillimin e Standardit Unik të sinjalistikës bjeshkatare në Republikën e Kosovës”.
“Në territorin e Republikës janë duke u shënuar shtigjet që të gjithë njerëzit që duan natyrën t’i arrijnë majat bjeshkatare sigurt dhe pa humbur orientimin”, thuhet në fund.
Po ashtu, edhe deputetja e AAK-së, Donika Kadaj-Bujupi, ka shpërndarë postimin e FBAK-së, duke e quajtur akt të papranueshëm, të shëmtuar e të dënueshëm./ Telegrafi.
