Federata e Basketbollit të Kosovës është në biseda me trajnerin e mirënjohur në Europë, italianin Simone Pianigiani.
FBK-ja është afër të emërojë trajnerin e ri që do ta udhëheqë ekipin e Kosovës në parakualifikimet e Botërorit Kina 2019.
Drejtuesit e FBK-së, janë në negociata me Pianigianin dhe me gjasa të mëdha burime të ndryshme mësojnë se trajneri i mirënjohur italian do ti bashkohet Përfaqsueses kosovare, transmeton Superliga e Kosovës në Basketboll në Facebook.
Simone Pianigiani, ka një karrierë tejet të bujshme në basketbollin europian, ku karrierën si trajner e ka nisur fillimisht tek ekipi italian, Montepaschi Siena si asistent më pas edhe trajner, ku me këtë ekip e ka fituar 6 herë titullin e kampionit të Italisë. Më pas e ka drejtuar, reprezentacionin italian për vite me radhë, në EuroBasket 2011, EuroBasket 2013, si dhe në EuroBasket 2015. Në sezonin 2012-13, e ka drejtuar gjigantin e basketbollit turk dhe europian Fenerbahce.
Gjashte herë kampion në Itali, fituesi i Kupës në Turqi dhe dy herë pjesëmarrës në final-fourin e Euroligës me Montepaschi Sienan, Pianigiani shihet si kandidati kryesor për të marrë timonin e Kosovës.
Ndërsa momentalisht, Simone Pianigiani e drejton ekipin izraelit Hapoel Jerusalem, ku para pak ditësh edhe e ka fituar Kupën e Izraelit me ekipin në fjalë.
Përpos Italianit, trajneri tjetër i kontaktuar është Gjermani Dirk Bauremann. Fitues i medaljes së argjendë në Eurobasket 2005 me Gjermaninë qe udhëhiqej nga Dirk Nowitzki, Bauermann për afro 10 vite ka qenë trajner i pancerëve, ndërsa së fundi ka drejtuar kombëtaren e Iranit. Sidoqoftë duket se zgjedhja e parë për FBK pritet të jetë Italiani, Pianigiani, ndërsa marrëveshja edhe mund të përmbyllet në ditët në vazhdim.
/Superliga e Kosovës në Basketboll/Telegrafi/