FBI ka bërë një kontroll në pronën e Donald Trump në Mar-a-Lago në Palm Beach, Florida, ka njoftuar ish-presidenti.
“Këto janë kohë të errëta për kombin tonë, pasi shtëpia ime e bukur, Mar-A-Lago në Palm Beach, Florida, është aktualisht nën rrethim, bastisje dhe e pushtuar nga një grup i madh agjentësh të FBI-së”, ka thënë Trump në një deklaratë, shkruajnë mediat e huaja, përcjell Telegrafi.
Trump shtoi se agjentët e FBI-së ishin në Mar-a-Lago dhe tha se “ata madje hynë në kasafortën time”.
“Asgjë e tillë nuk i ka ndodhur kurrë një presidenti të Shteteve të Bashkuara më parë”, ka shtuar ai.
“Pas punës dhe bashkëpunimit me agjencitë përkatëse qeveritare, kjo bastisje e paparalajmëruar në shtëpinë time nuk ishte e nevojshme apo e përshtatshme”.
Ish-presidenti nuk ishte në Florida në kohën kur u ekzekutua urdhri i kontrollit, shkruan CNN.
Kërkimi filloi të hënën herët në mëngjes (sipas kohës lokale) dhe personeli i zbatimit të ligjit dukej se ishte i fokusuar në zonën ku ndodhen zyrat dhe ambientet personale të Trump, sipas një personi të njohur me këtë çështje.
Siç vënë në pah mediat e huaja, Departamenti i Drejtësisë ka hetuar zbulimin e kutive të të dhënave që përmbajnë informacione të klasifikuara që u dërguan në Mar-a-Lago pas përfundimit të presidencës së zotit Trump.
Por nuk ishte e qartë nëse kërkimi i FBI ishte i lidhur me atë hetim.
Ndërkohë një hetim i veçantë në lidhje me përpjekjet e aleatëve të Trump për të zhbërë rezultatet e zgjedhjeve presidenciale të vitit 2020 dhe trazirat e 6 janarit 2021 në Kapitolin e SHBA-së është intensifikuar gjithashtu në Uashington. /Telegrafi/