Një djalë 7-vjeç nga Oklahoma u mbyt nga një qen, të cilin familja e tij e kishte shpëtuar disa javë më herët, kanë bërë të ditur familjarët e vogëlushit të ndjerë.
Kur James McNillis të dielën nuk u kthye në shtëpi dhe nuk iu përgjigje thirrjeve të familjarëve, prindërit e raportuan në polici zhdukjen e tij, transmeton Telegrafi.
Babai i vogëlushit, Michael më vonë gjeti të birin e tij të vdekur në oborrin e shtëpisë, ku qeni të cilin e kishin shpëtuar tri javë më parë e kishte sulmuar për vdekje.
Sipas familjarëve të vogëlushit, qeni nuk kishte shfaqur kurrfarë shenja të agresivitetit para sulmit vdekjeprurës.
E pas arritjes në vendin e ngjarjes, policia e dërgoi qenin në një strehimore, e rasti i vogëlushit që humbi jetën po cilësohet si incident.
James po luante në oborr me qenin e tij para se të ndodhte sulmi. Fqinja Shannon Eddison, ka thënë se ajo dhe familja e saj po festonin një ditëlindje në oborr, kur dëgjuan gruan duke bërtitur.
“Ka qenë një britmë që ndryshon jetën, e kuptuam që diçka nuk është në rregull. Si nënë, e njoh atë britmë”, ka thënë Eddison.
E babai i vogëlushit ka shkruar në Facebook, se familja e tij planifikojnë të largohen nga ajo lagje në momentin që kryejnë procedurat e varrimit të birit.
“Ishte plot jetë. Po ndihem i vetmuar dhe i humbur pa të. Këtu gjithçka të dhemb pa djalin tonë të vogël”, ka shkruar në Facebook babai i tij. /Telegrafi/