Për këtë, drejtuesit e Lidhjeve Rajonale kanë mbajtur sot konferencë për shtyp, për të bërë të ditur vendimin e tyre.
“Ju kemi ftuar për t’iu treguar për kërkesën tonë drejtuar kryetarit të FFK-së, Fadil Vokrri, për t’u rikandiduar për postin e kryetarit, duke marrë parasysh punën e madhe dhe momentin e ndjeshëm për futbollin kosovar në raport me komunitetin ndërkombëtar të futbollit”, ka deklaruar Ismajl Ajeti, kryetar i Lidhjes Rajonale të Prishtinës, përcjell GazetaOlle.com.
“Me rëndësi të veçantë është vazhdimi i procesit të anëtarësimit të FFK-s në UEFA dhe FIFA gjegjësisht finalizimin e saj, ku roli i kryetarit Vokrri me bashkëpunëtorë ka qenë krucial, prandaj konsiderojmë se është edhe e moralshme dhe domethënëse që në krye të saj të jetë Vokrri”, shtoi ai.
Të pranishëm në konferencë ishin përfaqësuesit e të gjitha Lidhjeve Rajonale si: Agim Maloku, kryetar i LRF të Prizrenit, Iljaz Mjaku, kryetar i LRF të Ferizajt, Ali Zasella, kryetar i LRF të Mitrovicës, Malazog Hoxha, kryetar i LRF të Gjilanit, Ismet Ahmeti, sekretar i LRF të Pejës dhe Sadik Byci, sekretar i LRF të Gjakovës.
“Mbajtja gjallë e futbollit kosovar dhe të gjitha garave përkatëse në kushte jashtëzakonisht të vështira ishte meritë e të gjithë lojtarëve, sponsorëve, trajnerëve, tifozëve dhe të tjerëve dhe njëkohësisht ndërkombëtarizimi i tij, na shtynë që të kërkojmë në mënyrë të pa rezervë rikandidimin e Fadil Vokrri, i cili është edhe simbol i kësaj loje më të popullarizuar në botë. Pothuajse të gjithë delegatët dhe kryetarët e shtatë rajoneve jemi unik dhe kërkojmë ri kandidimin e kryetarit Vokrri. Kjo kërkesë është protokolluar në administratën e FFK-së dhe presim vendimin pozitiv të kryetarit dhe të KE të FFK-së”, ka thënë në fjalën e tij kryetari i LRF Ismajl Ajeti.
Legjenda e futbollit kosovar është kryetar i FFK-s prej vitit 2008.
Vokrri momentalisht ndodhet në Turqi, ku po lobon për të marrë mbështetjen e kësaj federate para kongresit të UEFA-s që mbahet në mars 2015, e në të cilin pritet të votohet për anëtarësimin e FFK-s në UEFA.