Disa vende të Evropës janë përshirë në protesta të forta kundër certifikatës së gjelbër anti-covid, e cila parashikon detyrimin e paraqitjes së saj për të hyrë në bare, restorante dhe në ambiente të tjera kulture dhe argëtimi.
Protesta të ashpra kanë shpërthyer në Francë pas hyrjes në fuqi të detyrimit të paraqitjes së certifikatës së gjelbër anti-covid, për të hyrë në bare, restorante dhe në ambiente të tjera kulture dhe argëtimi. Në disa zona të Parisit nuk kanë munguar përleshjet mes protestuesve dhe policisë.
Autoritetet njoftuan se 18 mijë protestues mbushën rrugët e kryeqytetit. Të udhëhequr kryesisht nga “jelek-verdhët”, slogani kryesor i protestuesve ishte: “Nuk jemi minj laboratori”.
Revoltimi nisi dhe për vaksinimin e detyrueshëm për të gjithë punonjësit e shëndetësisë. Propozimi i këtij ligji është paraqitur nga presidenti Macron, dhe është aprovuar ditën e Premte në Asamblenë Kombëtare.
Rastet pozitive me variantin Delta po shtohen në të gjithë Francën. Vetëm në 24 orët e fundit autoritetet shëndetësore regjistruan mbi 25 mijë të infektuar.
Protesta gjithashtu ka pasur edhe në shumë qytete të Italisë, ku mijëra persona kanë shprehur kundërshtimin e tyre ndaj certifikatës së gjelbër, e cila do të jetë e detyrueshme duke nisur nga data 6 Gusht.
Ashtu si në Francë, vetëm zotërimi i certifikatës së Gjelbër do të lejojë hyrjen në palestra, muze, kinema, teatro, restorante dhe në ambiente të tjera kulturore.
Kryeministri Italian Mario Draghi është shprehur se ka qenë i detyruar që ta bëjë të detyrueshme certifikatën e gjelbër, në mënyrë që qeveria të mos detyrohet të rivendosë masa të rënda shtrënguese dhe mbyllje qoftë edhe të pjesshme, të cilat, sipas Draghit, edhe ekonomikisht janë katastrofike.
Protestat ndaj masave anti-covid kanë përfshirë edhe Holandën. Mijëra protestues u mblodhën këtë fundjavë në një park publik në periferinë e Amsterdamit. Duhet theksuar se prej muajsh Holanda është ndër vendet më opozitare ndaj masave anti-covid të vendosura nga BE. /oranews/