Trajneri i Francës, Didier Deschamps, nuk ka ftuar Kylian Mbappen për ndeshjet e Ligës së Kombeve kundër Izraelit më 10 tetor dhe Belgjikës më 14 tetor. Deschamps tha se nuk dëshiron të rrezikojë me sulmuesin e Real Madridit, i cili kohët e fundit po lufton me lëndime.
Mbrojtësi i pensionuar francez, Patrice Evra ka komentuar mungesën e Mbappes nga lista e kombëtares në programin RMC: “Nuk është vetëm Deschamps, por e gjithë Franca i dha shumë Mbappes. Ai mori çelësat e PSG-së dhe kombëtares franceze, por ai është ende i ri”.
“Ju të gjithë e kthyet atë në një legjendë. Me gjithë respektin që kam për Mbappen, ai nuk është ende në nivelin e Karim Benzemas”, deklaroi Evra, i cili bëri 81 paraqitje për Francën, ndërsa fitoi 20 trofe me Manchester United dhe Juventus.
Mbappe përveçse ka luajtur për Monacon, PSG dhe Real, ka luajtur edhe ndeshje të shkëlqyera për kombëtaren. Ai shënoi 48 gola në 86 paraqitje dhe fitoi Kupën e Botës 2018, Ligën e Kombeve 2021 dhe luajti në finalen e Kupës së Botës 2022, ku humbën nga Argjentina në penallti.
“Nëse e fton Mbappen dhe ai lëndohet, do të prishësh marrëdhëniet me Florentino Perez. Reali nuk është PSG, nuk mund ta rrezikosh”, përfundoi Evra. Kujtojmë se Antoine Griezmann, sulmuesi i Atletico Madridit dhe një nga futbollistët më të mirë francezë, i dha fund karrierës së tij kombëtare.
Lojtarët e Francës të ftuar për ndeshjet e radhës të Ligës së Kombeve:
Portierë: Alphonse Areola (West Ham), Mike Maignan (Milano), Brice Samba (Lens)
Mbrojtës: Jonathan Clauss (Nica), Lucas Digne (Aston Villa), Wesley Fofana (Chelsea), Theo Hernandez (Milan), Ibrahima Konate (Liverpool), Jules Kounde (Barcelona), William Saliba (Arsenal), Dayot Upamecano (Bayern) .
Mesfushorët: Eduardo Camavinga (Real Madrid), Youssouf Fofana (Milan), Matteo Guendouzi (Lazio), Manu Kone (Roma), Aurelien Tchouameni (Real Madrid), Warren Zaire-Emery (PSG)
Sulmues: Bradley Barcola (PSG), Ousmane Dembele (PSG), Randal Kolo Muani (PSG), Christopher Nkunku (Chelsea), Michael Olise (Bayern), Marcus Thuram (Inter).