Shoqata “sporti na bashkon” ka vlerësuar mesfushorin e Partizanit, Esat Malën.
Futbollisti është fitues i Çmimit “Talenti Sezonit 2018-2019” falë anketës tradicionale organizuar nga shoqata, ”Sporti na Bashkon”, në edicionin e 11 të saj.
Mesfushori i talentuar i kampionëve në fuqi dhe kombëtares U-21 të Shqipërisë, falë votimeve të një jurie të përbërë nga trajnerë dhe gazetarë sportiv, arriti të shpallet fitues i këtij çmimi prestigjioz duke grumbulluar numrin më të madh të pikëve.
Ceremonia e rastit është organizuar në ambientet e klubit të futbollit Partizani. Çmimi Esat Malas i është dorëzuar nga drejtori ekzekutiv i shoqatës “Sporti na Bashkon” Gëzim Nushi.
“Shumë i lumtur dhe i vlerësuar për çmimin. Një falënderim i veçantë për gjithë çunat e ekipit dhe gjithë stafit të Partizanit për këshillat dhe ndihmën gjatë sezonit të kaluar. Falënderues familjes dhe shoqërisë për mbështetjen e vazhdueshme”, ka shkruar ai në llogarinë personale në Facebook.
Ndryshe, futbollisti thuhet se po kërkohet nga disa skuadra duke përfshirë edhe Besiktasin gjersa më parë ka luajtur te Liria dhe Ballkani. /Telegrafi/
