Era Istrefi, Will Smith dhe Nicky Jam janë tre artistët që do të performojnë në ceremoninë përmbyllëse të botërorit Rusia 2018.
Rreth 48 orë para finales, treshja ka mbajtur një konferencë për shtyp para medieve, ku kanë ndarë edhe eksperiencat e tyre.
Bukuroshja jonë ka thënë se është e privilegjuar se ka qenë pjesë e botërorit me këngën “Live It Up”.
Ajo e ka konsideruar si një punë të madhe tërë projektin e realizuar me aktorin dhe këngëtarin.
“Jam e nderuar dhe ndjehem e privilegjuar që jam pjesë e Kupës së Botës. Ishte një punë e madhe për mua. Bashkimi i të gjitha kombeve përmes muzikës është e mahnitshme. Moska është një qytet i bukur. Njerëzit më kanë pritur ngrohtësisht dhe ishin mikpritës”, ka thënë Istrefi.
Ajo më tutje tha se momenti më i bukur i botërorit ishte kur shënuan gola shqiptarët e Zvicrës kundër Serbisë.
Kur pyet Era rreth lojtarit më të mirë të kampionatit, pohoi se i mungon shkëlqimi i të pensionuarit, Ronaldinho, por që ka veçuar më së shumti shkëlqimin e Cristiano Ronaldos dhe Lionel Messit.
Ndërsa, aktori Smith ka pohuar se “kjo është ngjarja më e madhe sportive në botë. Kur më ftuan të bëhesha pjesë e saj, as nuk kam menduar dy herë rreth kësaj. Kupa Botërore është një energji magjike globale. Më pëlqen të jem pjesë e saj”.
Theksojmë se ceremonia përmbyllëse e kampionatit botëror do të mbahet para orës 17:00 të ditës së diele, ku në finale do të takohen Franca dhe Kroacia. /Telegrafi/
