Epidemia e gripit arrin një tjetër kulm në Shqipëri. Pas pikut të infektimeve në mesin e muajit janar, AH1N1 (gripi i derrit), javën e dytë të shkurtit, shënon vlerat më të larta të të prekurve deri tani.
Mbi 17 700 raste janë konfirmuar të sëmurë nga gripi dhe infeksionet e tjera respiratore vetëm këtë javë dhe sipas Institutit të Shëndetit Publik kjo përbën shifrën më të lartë të infektimeve krahasuar edhe me dimrin e një viti më parë.
Referuar buletinit javor, në këtë periudhë piku të qarkullimit të gripit, moshat pediatrike janë më të prekurat.
Ndërsa Tirana mban vendin e parë, ndjekur nga Gjirokastra e Lezha, për numrin më të madh të rasteve me grip dhe infeksione të tjera respiratore.
Por, kryeqyteti aktualisht është kthyer në vatër infeksioni të fruthit.
Nga 22 fëmijë të prekur me fruth deri tani, pjesa më e madhe e tyre janë në Tiranë, qyteti që mban vendin e parë për nivelin më të ulët të vaksinimit.
Drejtoresha e Institutit të Shëndetit Publik, Eugena Tomini, konfirmon edhe raste të prekur me zgjebe në vendin tonë, ndonëse, sipas saj, nuk kemi të bëjmë me shpërthim masiv epidemiologjik.
Ekspertë të Institutit të Shëndetit Publik po monitorojnë situatën epidemiologjike në vend, ndërsa u bëjnë thirrje mjekëve të qendrave shëndetësore të raportojnë çdo rast të dyshuar me fruth apo zgjebe./A2 CNN