Maqedonia e Veriut në futboll nesër mbrëma do të jetë mysafire i Italisë në Romë për ndeshjen e vlefshme të eliminatoreve për Kampionatin Europian 2024.
Para këtij dueli, në konferencën zyrtare ka folur kapiteni Enis Bardhi, i cili ka thënë se ndeshja e nesërme është ndryshe nga ajo në Shkup.
“Ndeshja në Shkup ndaj italianëve është pjesë e historisë. Ajo ndeshje do të na ndihmojë të korrigjojmë gabimet. Nesër kemi një ndeshje të re, ndoshta lojtarë të rinj dhe një sistem të ri. Nuk kam nevojë të theksoj se jemi të motivuar, kjo është një lojë që çdo futbollist dëshiron ta luajë. Kemi futbollistë të rinj dhe ky është një shans për të qenë më të mirë dhe për këtë na duhen ndeshje të tilla”.
“Të gjithë përgatitemi individualisht, kemi cilësi të shkëlqyera dhe nuk besoj se Italia do të na nënvlerësojë. Besoj se do ta bëjmë sërish krenar të gjithë ata që na përkrahin. Dhëntë Zoti që ndeshja të përfundojë si në Shkup”, tha Enis Bardhi.
Maqedonia në dy përballjet e fundit me italianët regjistron një barazim dhe një fitore. Takimi ndërmjet Italisë dhe Maqedonisë së Veriut do të luhet nesër në stadiumin “Olimpico”, duke nisur nga ora 20:45. /Telegrafi/