Lumi Shkumbin në Tetovë vazhdon të jetë përplot me gurë dhe i papastruar gjatë rrjedhës së tij brenda në qytet. I njëjti është përplot me rërë dhe gurë që vijnë nga pjesët më të larta dhe të njëjtat nuk janë larguar, gjegjësisht autoritetet lokale nuk kanë ndërmarrë masa për pastrimin e lumit, shkruan e përditshmja “Koha”.
Qytetarët janë revoltuar dhe shprehen se i njëjti duhet të pastrohet rregullisht, ndërsa banorët që jetojnë afër lumit Shkumbin akuzojnë edhe qytetarët e pandërgjegjshëm që hedhin mbeturina në lum. Ata nënvizojnë se një pasqyrë e këtillë në lumin e Tetovës zgjatë që nga koha e vërshimeve të këtij viti, pasi që me vete lumi ka sjellë shumë rërë dhe gurë nga pjesët më të larta të burimit të këtij lumi.
Banorët janë ankuar se autoritetet lokale duhet të marrin masa parandaluese në kohë, sepse tashmë në muajt në vijim pritet që të rritet niveli i ujit të lumit Shkumbin dhe rreziku për të vërshuar i njëjti – është i madh.
Në ndërkohë, nga Komuna e Tetovës kanë theksuar se kanë përgatitur një plan akcional, i cili është dorëzuar Qeverisë gjatë kohës së vërshimeve.
Burime të gazetës Koha bëjnë të ditur se në bazë të vlerësimeve të Komunës së Tetovës, për pastrim më të mirë të lumit nevojiten edhe 5 ton naftë shtesë, të cilët komuna i ka kërkuar nga Ministria e Ekologjisë. Pritet që javën e ardhshme të dihet nëse ministria do të marrë vendim pozitiv për këtë kërkesë. /Telegrafi/