Pavarësisht se nga Regjistri Qendror mohojnë se në dikasteret e këtij institucioni ka mbërritur kërkesë për ndryshim-emërtim të shkollave të Çairit, ministri i Arsimit dhe Shkencës vazhdon të përsëris qëndrimet e tij lidhur me emrat. Ai edhe sot nga shkolla, “Rajko Zhinzifof”- “Ismail Qemali”, tha se çështjen e emrave e ka bllokuar Regjistri Qendror. Ademi thotë se në këtë periudhë, më shumë rëndësi duhet t’i kushtohet cilësisë së arsimit.
“Në këtë periudhë duhet të fokusohemi në ngritjen e kualitetit të procesit edukativo-arsimor se sa në krijimin e tensioneve të cilët nuk i kontribuojnë kualitetit të mësimdhënies. Prandaj temë diskutimi në ministri dhe në mbarë opinionin edhe në komunë si themelues i shkollave fillore do të duhet të jetë se si ta ngrisim kualitetin”, deklaroi Arbër Ademi, Ministër i Arsimit dhe Shkencës.
Edhe kryetari i komunës së Çairit Visar Ganiu tha se komuna i ka kryer të gjitha detyrimet që ka pasur për obligim t’i kryej për ndryshimin e emrave.
“Të gjitha procedurat që i kemi me ligj i kemi mbaru, i kemi adresuar atje ku duhet dhe informatat që i kemi është në Regjistrin Qendror. Tek Regjistri Qendror, atje qëndron problemi. Nga institucionet përkatëse, ne nuk kemi asnjë informatë kthyese”, pohoi, Visar Ganiu, kryetar i Komunës së Çairit.
Ndryshe, Ministri i Arsimit dhe Shkencës, Arbër Ademi i shoqëruar nga kryetari i Komunës së Çairit, Visar Ganiu vizituan shkollën “Rajko Zhinzifof”, ku me iniciativë të këshillit të prindërve dhe me ndihmën e kompanisë “GDI”, u promovua, kabineti robotik, në të cilin nxënësit e kësaj shkolle do të kenë mundësi të mësojnë rreth punës robotike dhe montimit të tyre./Tv21/
