Tetë muaj pas debatit të parë publik për ndërrimin e emrave të rrugëve, shkollave dhe institucioneve të tjera në Tetovë ende asgjë konkrete në këtë drejtim. Komuna e Tetovës është në pritje të propozimeve të emrave nga sektori civil që më pas të vazhdojë me formimin e një Komisioni të posaçëm i cili do të bën përzgjedhjen e emrave të propozuar. Vendimet e këtij Komisioni do të duhet të kalojnë në Qeveri për t’u rikthyer për votim në këshillin komunal të Tetovës. Kreu I këshillit Besar Durmishi nuk shprehet optimist se Qeveria do të mbështes kalimin e këtij projekti pasi siç tha shpesh herë kanë pasur pengesa me pushtetin qendror sa iu përket projekteve komunale.
“Kemi hasur në pengesa nga pushteti qendror me të vetmen arsye se nuk e kanë pushtetin lokal, dyshojmë se mund të ketë pengesa. Kemi shumë punë që duhet të kalojnë në Qeveri por pikërisht pse nuk e kanë pushtetin lokal shumë punë nuk kalojnë as në parlament. Do të ketë pengesa, nuk e di se si do e presin këtë hap të komunës së Tetovës por çdo vendim i deritanishëm i Qeverisë nuk na ka dëmtuar neve si persona por iu ka bërë dëm qytetarëve të Tetovës pavarësisht ndasive politike”, tha Besar Durmishi, Kryetar I Këshillit të Komunës së Tetovës.
Kjo nuk është pengesa e vetme me të cilën përballet ky projekt. Ai nuk gjen mbështetje as nga këshilltarët e VMRO-së në komunën e Tetovës, të cilët janë vendimtar për votimin e tij pasi I njëjti parashihet të votohet me parimin e Badenterit. OBRM-PDUKM edhe njëherë u shpreh e prerë se këtë projekt nuk e mbështet.
“Qëndrimi jonë është I qartë dhe në këtë drejtim ne nuk mbështesim procese retrograde të cilat nuk do sjellin asnjë gjë të mirë për standardin e qytetarëve. Të rinjtë në Tetovë kërkojnë standard modern për jetesë dhe shkollim. Tetova nuk ka pallat kulture modern, nuk ka kinema, nuk ka teatër, park apo hapësira sportive. Fokusi jonë është zgjidhja e problemeve bazike ndërsa proceset retrograde të cilat nuk sjellin asnjë përparim në jetën e të rinjve nuk do t’i përkrahim”, thonë nga OBRM-PDUKM.
Qytetarët nga ana tjetër nuk besojnë se çështja e ndërrimit të emrave ndonjëherë do të bëhet realitet.
“Ajo nuk bëhet, s’mund të bëhet. Qe sa vjet nuk ndërrohen, ne i thërrasim me emër tjetër, shteti me emër tjetër rrugët. Nuk bëhet kjo punë… Pse nuk jeni optimist? Sepse nuk bëhet asgjë, a ke parë diçka të bëhet, të rregullohet ? Unë deri sot, jo”.
“Është vonuar shumë ndërrimi i emrave, është dashur që tani të ishin bërë. Me kohë të ishin bërë, a u prish komunizmi? Prishi dhe emrat.. por ne nuk kemi njerëz. Hajdutë kemi në kryesi që e shohin vetëm xhepin”.
Propozimet aktuale nga shoqata akademike shqiptare në Tetovë janë emra personalitetesh të cilët nuk lidhen vetëm me rilindjen kombëtare por me personalitetet që kanë kontribuar për qytetin e Tetovës. Ndryshe, shumë kryetarë të komunës së Tetovës kanë ndërmarrë nismë për ndryshimin e këtyre emrave por asnjëherë nuk kanë gjetur pajtim brenda këshillit komunal që këto emra të zëvendësohen me emra të rinjë. Në Tetovë aktualisht, edhe pse disa rrugë janë emëruar në gjuhën shqipe, të njëjtat shfrytëzohen vetëm nga Komuna e Tetovës gjatë komunikimit me qytetarët kurse në dokumente zyrtare vazhdojnë të qëndrojnë emrat nga koha e ish Jugosllavisë./Alsat/