Modelja e njohur shqiptare, Emina Çunmulaj, është duke qëndruar në Kosovë për një vizitë, ku ka marrë pjesë në disa aktivitete të rëndësishme. Vizita e saj përfshiu një udhëtim prekës në varrezat e familjes Jashari në Prekaz dhe pjesëmarrjen në ceremoninë e 4 Korrikut në Ambasadën Amerikane.
Një nga momentet më të rëndësishme të vizitës së saj ishte pritja në zyrën e Kryetarit të Prishtinës, Përparim Rama. E shoqëruar nga ish-presidentja Atifete Jahjaga, Emina u mirëprit ngrohtësisht nga kryetari, i cili i dhuroi asaj një dhuratë simbolike nga Komuna e Prishtinës.
Në një postim në Instagram, Kryetari Rama shprehu kënaqësinë e tij për takimin me Eminën: “Sot kisha kënaqësinë të takojë konsullen e nderit të Shqipërisë në Florida në SHBA, ambasadoren e vullnetit të mirë në shoqatën Pan shqiptare Vatra në Amerikë, Emine Çunmulaj, e cila erdhi në Odën e Kryeqytetit për vizitë me Presidenten Atifete Jahjaga. Gjatë takimit, diskutuam mënyrat e bashkëpunimit në fusha të ndryshme, art e kulturë, me synimin për të ndërtuar ura të reja bashkëpunimi dhe përfitime të ndërsjella me artistë të shumtë nga Shtetet e Bashkuara të Amerikës”.
Emina iu përgjigj postimit, duke ndarë entuziazmin e saj për bashkëpunimet e ardhshme: “Një kënaqësi absolute dhe mezi pres bashkëpunimet e ardhshme. Prishtina po shkëlqen më shumë që kur keni vendosur punën tuaj të palodhur në transformimin e saj dhe padyshim që ka pasur një ndikim”.
Vizita e Emina Çunmulaj thekson lidhjet e forta midis Kosovës dhe diasporës shqiptare, si dhe potencialin për shkëmbime të ardhshme kulturore dhe artistike që mund të përfitojnë të dyja komunitetet. Pjesëmarrja dhe përfshirja e saj në këto ngjarje nënvizon rëndësinë e nderimit të trashëgimisë dhe forcimit të marrëdhënieve ndërkombëtare. /Telegrafi/
