Një shqiptar i ri ka shpëtuar qendrën e refugjatëve nga një katastrofë e vërtetë. Por, me këtë rast ai vetë ka humbur gjithë çfarë ka pasur, shkruan waz.de.
Siç pohon Policia në Hagen, në mbrëmjen e të premtes, ai e ka shpëtuar nga vdekja një grua 27-vjeçare nga Taxhikistani, e cila i kishte vënë zjarrin dhomës së saj dhe donte të vetëvritej.
Shqiptari, i cili jeton me gruan dhe djalin e tij nëntëmuajsh në një banesë me kuzhinë të përbashkët, kishte dëgjuar thirrjet e gruas dhe kishte shkruar për t`i ofruar ndihmë, duke e evituar katastrofën.
“Ai ia ka shpëtuar jetën asaj”, thotë pastori i kishës protestante lokale, Thomas Gerlach.
Ndërkohë, gruaja e cila ka pësuar lëndime në krah është duke u shëruar në spital dhe nuk është në rrezik jete. Por, shpëtimtari i jetës së saj me gjithë familjen, ka humbur gjithçka që ka pasur, pasi që i është djegur banesa. Për këtë arsye, pastori Gerlach ka iniciuar një aksion për të ndihmuar shqiptarin e ri. Ai ka vendosur kontakt me Caritasin për të organizuar dhurimin e artikujve ushqimorë, veshmbathjes dhe mbulesave për shtretër.
“Familja e dëmtuar nuk ka nevojë për shumë gjëra”, thotë prifti. “Por aktualisht ajo nuk ka asgjë fare”.
Shpëtimtari nuk kishte mundur të shpëtonte as telefonin e tij celular nga banesa për t`i telefonuar punëdhënësit të vet të ri në qytetin fqinj se për shkaqe objektive nuk mund të shkonte në punë atë ditë. /albinfo.ch/