Qeveria e Kosovë në mbledhjen e së mërkurës ka emëruar një Komision i cili është përgjegjës për verifikimin e diplomave të studentëve të universiteteve në Mitrovicën e veriut.
Kryeministri Albin Kurti para kabinetit qeveritar njoftoi se komisioni do të ketë në përbërje një këshilltare të tij dhe dy pjesëtarë të Ministrisë së Arsimit, Shkencës, Teknologjisë dhe Inovacionit.
“Komisioni do të ketë këtë përbërje: Elizabeth Gowing, këshilltare e jashtme e kryeministrit për çështje të komuniteteve dhe Arben Shamolli e Mimoza Jashari – pjesë e Ministrisë së Arsimit, Shkencës, Teknologjisë dhe Inovacionit”, tha Kurti.
Tutje, ai bëri të ditur se Komisioni do të jetë përgjegjës për hartimin dhe miratimin e rregullave të procedurës që përfshinë por nuk kufizohen në procedurën e aplikimit, caktimin e kritereve dhe vlerësimit të tyre me qëllim të verifikimit të diplomave sipas mandatit.
“Këto rregulla nuk do të kenë vlefshmëri më të gjatë se sa gjashtë muaj”, përfundoi kreu i ekzekutivit. /Telegrafi/