Të hënën, më 5 dhjetor ndërroi jetë artisti i madh dhe drejtori menaxhues i Telegrafit, Arlind Gjikolli i njohur edhe si Gjikla.
Për vdekjen e tij erdhën reagime të shumta nga figura politike, artistë, kolegë, miq e familjarë.
Humbja e tij e hershme la zbrazëti tek secili që e njohu ndërsa Gjikla po vazhdon të kujtohet për mirësinë dhe veprat që la pas.
Moderatorja e njohur shqiptare, Elita Rudi ditën e sotme (e diel) ka bërë një tjetër dedikim prekës për Gjiklën duke shpërndarë një nga mesazhet e fundit që ka shkëmbyer me të.
Ndërsa në një tjetër shkrim, prezantuesja u shpreh duke thënë se ‘humbjet e mëdha janë plagë të përhershme në zemër’.
“Humbjet e mëdha janë plagë të përhershme në zemër. Qëllimet dhe mësimet e njerëzve të mëdhenj nuk vdesin kurrë. Ti, na mësove dhe tashmë mësimet tua po jetësohen!. Në përjetësi, Arlind”, ka shkruar Elita.
Kujtojmë që Gjikla ishte themeluesi dhe shtylla krijuese e grupit WNC nga Peja, që zhanrin e muzikës rep në Kosovë e çoi në një stad më të zhvilluar, qoftë me tekste të angazhuara, me muzikë apo me interpretim. “Çka kom pasë”, “Qikat e mira”, “Për ty” … janë disa nga këngët e këtij grupi, që edhe sot dëgjohen dhe frymëzojnë gjeneratat e reja.
Pas grupit WNC, Gjikla ka vazhduar edhe solo-karrierën, me tekste që kundërshtonin anomalitë e shoqërisë së Kosovës.
Në dhjetë vjetët e fundit, Gjikla ishte COO (Drejtor Menaxhues) i Telegrafit. Si person që jetonte me kohën dhe që donte përparimin, ai dha kontribut të madh në zhvillimin dhe rritjen e këtij portali. Gjikla ka qenë një nga shtyllat e risive teknologjike që Telegrafi çdo vjet ka sjell për lexuesit shqiptarë. /Telegrafi/