Liverpool është eliminuar nga gara në Kupën FA.
Ishte skuadra nga Championshipi anglez, Wolverhampton Wanderers që i ka mposhtur vendasit me rezultat 1-2 për të kaluar tutje.
Me të filluar ndeshja, mysafirët treguan se nuk kanë udhëtuar për turizëm në ‘Anfield’.
Pas një ndërprerje, ishte mbrojtësi Richard Stearman që shënoi golin e epërsisë me kokë në minutën e parë të ndeshjes.
Liverpool provoi barazimin e rezultatit në pjesën e parë por sulmet e tyre nuk gjenin rrjetën e golit.
E derisa skuadrat po bëheshin gati për të shkuar në pushim, një aksion i bukur i mysafirëve solli edhe golin e dytë.
Ishte mesfushori i sapo transferuar tek Wolves, Andre Weimann që shënoi bukur pasi kaloi edhe portierin vendas për 0-2.
Me epërsi prej dy golave, Wolves shkoi në pushim prej 15 minutave.
Trajneri i Liverpool, Jurgen Klopp në pjesën e dytë inkuadroi në lojë lojtarë titullar si Philippe Coutinho, Daniel Sturridge e Emre Can.
Mirëpo edhe përkundër ndryshimeve të bëra, Liverpool nuk arriti ta shmang humbjen në këtë përballje.
Golin e nderit për ‘The Reds’, e shënoi sulmuesi belg, Divock Origi në minutën e 86 të ndeshjes.
Kështu pas eliminimit nga Kupa e Ligës, Liverpool mbetet jashtë garës edhe nga Kupa FA, dhe tani synimi kryesor i skuadrës së Jurgen Klopp mbetet Liga Premier edhe pse do të jetë mision tejet i vështirë. /Telegrafi/
