Prokurori special i dorëhequr, Elez Blakaj ka thënë se gjendet në Shtetet e Bashkuara të Amerikës dhe se dorëheqjen e ka ofruar me qëllim të mbrojtjes së familjes së tij, pasi kishte marrë sugjerime se siguria e tij dhe familjes janë në rrezik.
“Aktualisht e kam statusin e turistit, tash më ka nxit më shumë për të ardhmen time. Duhet të marr një vendim sepse këtu jam me familje. Tash jam në SHBA e kam shtyer dy herë fluturimin sepse nuk ndihem i sigurt të kthehem dhe jam i kërcënuar. Personalisht nuk jam ballafaquar me askënd dhe pesë pare nuk i jap për këtë çështje. Mirëpo në këto rrethana duhet të jem më i kujdesshëm”, tha Blakaj në një intervistë për “Betimi për Drejtësi”.
Blakaj ndër të tjera tha se është në konsultim me familjen e tij nëse do të kthehet në Kosovë apo jo.
“Asnjëherë nuk e kam menduar të punoj apo të veproj jashtë vendit tim. Tani më duhet një konsultim me familjen për tu kthyer në Kosovë apo jo”, tha Blakaj.
Hetimi i rastit të veteranëve të rrejshëm, sipas prokurorit Elez Blakaj, ka qenë tepër sfidues për shkak të lëndës voluminoze dhe kompleksitetit.
Në hetimin e këtij rasti, Blakaj ka thënë se ka kërkuar ndihmë për krijimin e një ekipi prokurorësh por që nuk ka pasur vullnet për një gjë të tillë.
Ai ka thënë se në hetimin e veteranëve ka pasur presione të mëdha.
Një prej institucioneve, që sipas tij, ende përballet me presione dhe kanosje të vazhdueshme është edhe Sektori për Veteranët e Luftës së UÇK-së në Ministrinë e Punës dhe Mirëqenies Sociale.
Blakaj ka thënë se për shkak të ndërhyrjeve të Kryeprokurorit Lumezi ishte detyruar që të merrej vesh me Kryeprokurorin e Prokurorisë Speciale Reshat Millaku që ta shmangnin Lumezin dhe mos ta informojnë për rrjedhën e hetimeve.
