Epidemiologu kryesor në Francë, Antoine Fontanet, ka paralajmëruar se vendi mund të përballet me “situata kritike” në dimër, në rast se vazhdon rritja e rasteve të vazhdueshme nga coronavirusi.
“Ne po përballemi me rritje të rasteve me nga 30 për qind në javë. Nëse vendi vazhdon me këtë ritëm, disa rajone do të përballen me situata kritike gjatë muajit dhjetor”, u shpreh ai.
“Do të ishte mirë që të veprojmë që tani, kështu edhe masat do të jenë më pak të rrepta më vonë”, paralajmëroi eksperti.
Sipas medieve të huaja, përcjell Telegrafi, njoftimi vjen derisa Franca regjistroi të dielën rreth 7,000 raste të reja me virus, të shtunën 8,500 të prekur dhe të premten e kaluar pothuajse 9,000 të infektuar.
Ndërkohë, Shefi i Organizatës Botërore të Shëndetësisë, Tedros Adhanom Ghebreyesus, tha të hënën se bota duhet të jetë më mirë e përgatitur për pandeminë e ardhshme, pasi ai u bëri thirrje vendeve të investojnë në shëndetin publik. /Telegrafi/