Raundi i ri i dialogut midis Beogradit dhe Prishtinës do të mbahet gjatë fundjavës në Bruksel në nivel ekspertësh, dhe një takim i nivelit të lartë është planifikuar për të hënën.
Krerët e të dyja palëve, në prani të Josep Borellit dhe përfaqësuesit special të Bashkimit Evropian, Miroslav Lajcak, do të hapin tre tema të reja, ka mësuar Tanjug në Bruksel.
Ekipet e ekspertëve do të vazhdojnë bisedimet sot mbi çështjet e ngritura tashmë të personave të zhdukur, personave të zhvendosur dhe marrëdhënieve ekonomike. Krerët e ekipeve negociuese, Marko Gjuriq dhe Skender Hyseni, pritet të bashkohen me ta të dielën, pas kthimit të tyre nga Uashingtoni, transmeton Telegrafi.
“Si pjesë e një marrëveshje gjithëpërfshirëse mbi normalizimin e marrëdhënieve midis Kosovës dhe Serbisë, takimi i nivelit të lartë të hënën do të merret me rregullimet e komunitetit jo-shumicë dhe zgjidhjen e pretendimeve financiare si dhe pasurive”, njoftoi zëdhënësi i BE-së, Peter Stano.
Stano konfirmoi se të hënën, 7 shtator, Ministri i Jashtëm i BE-së Josep Borell dhe Përfaqësuesi Special i BE-së, Miroslav Lajcak do të presin presidentin serb, Aleksandar Vuçiq dhe kryeministrin e Kosovës, Avdualh Hoti në një raund të ri të dialogut politik të nivelit të lartë midis Beogradit dhe Prishtinës.
“Pritjet tona nga ky takim në Bruksel janë që partnerët të vazhdojnë bisedimet e tyre. Ky është takimi i tretë i nivelit të lartë. Shpresojmë të vazhdojmë këtë dinamizëm pozitiv dhe të bëjmë përparim në zgjidhjen e çështjeve të hapura dhe qasjen e zgjidhjeve për të gjitha çështjet e hapura përmes një finale të mundshme të një marrëveshje ligjërisht të detyrueshme për normalizimin e marrëdhënieve”, thotë Stano.
Jozyrtarisht në Bruksel thuhet se ndërmjetësit e BE-së planifikojnë të intensifikojnë dialogun midis Beogradit dhe Prishtinës, në mënyrë që ekspertët të takohen çdo 10 ditë, dhe udhëheqësit – çdo tre javë. /Telegrafi/