Ekspertët presin rënie të fortë të shitjeve në tregun evropian të automjeteve. Krejt ndryshe flasin parashikimet për Kinën, SHBA-në dhe Rusinë.
"Bota e automjeteve aktualisht po riorganizohet, dhe kjo ka pasoja për vendet e prodhimit", thuhet në një studim të publikuar të premten (01.01.2010), nga studiuesi i njohur i sektorit të automjeteve, Ferdinand Dudenhöffer, nga Universiteti i Esenit.
Rënia e fortë në 2009 u shmang
Megjithë krizën financiare, falë subvencionimit nga shteti gjerman të blerjes së makinave të reja duke hequr dorë nga të vjetrat, si dhe në sajë të programeve stimuluese për koniunkturën, viti 2009 ishte i gjashti më i mirë për shitjet e makinave në botë.
"Rënia e fortë nuk ndodhi", thekson eksperti për sektorin e automjeteve, Dudenhöffer. Sipas studimit, gjatë vitit të kaluar në të gjithë botën u shitën 52,8 milionë makina, 5,4% më pak se një vit më parë.
Ndërsa në Gjermani, falë subvencionimit që morën nga shteti pronarët e automjeteve për të këmbyer modelet e vjetra me të reja, u shitën madje 3,8 milionë makina, ose 24% më shumë se gjatë 2008.
Edhe në Evropën Perëndimore sasia e shitur u rrit ndjeshëm. Ndërsa në Amerikën e Veriut shitjet ranë me gati 22%. Tregu rus pësoi një rënie të shitjeve prej 44%; humbës të tjerë ishin Japonia, Kanadaja, Spanja dhe Anglia. Kampioni në tregun ndërkombëtar të automjeteve sipas përllogaritjeve ishte Kina me një rritje prej 44%, 8,2 milionë makina të shitura.
2010 – zhvendosje masive e fuqisë blerëse
Për këtë vit eksperti Dudenhöffer pret zhvendosje masive të fuqisë blerëse. Por në total, tregu ndërkombëtar i automjeteve do të zhvillohet pozitivisht. Gjithsej kërkesa në gjithë botën do të rritet me 4,3% në 55 milionë makina të shitura, para së gjithash falë tregjeve në SHBA, Kinë, Rusi dhe Indi.
Ndërsa në Evropën Perëndimore do të shiten gati një milion makina më pak se në 2009, një minus prej 7%. Për Gjermaninë eksperti pret një rënie të kërkesës me 25%, në 2,8 milionë makina. "Përgjegjës për rënien e kërkesës është në radhë të parë shtysa artificiale që u krijua nga bonusi shtetëror për ndërrimin e automjeteve të vjetra", mendon Dudenhöffer. Gjermania ul gjithë tregun evropian.
(dw)