Edhe pse Korporata Energjetike e Kosovës ka marrë 124 milionë euro si subvencione nga qeveria, furnizimi me energji elektrike nuk është ende stabil. Zyrtarë të kësaj korporate kanë thënë se ata edhe gjatë këtij viti do të kërkojnë para nga qeveria.
Ndërsa, si mundësi e mirë për të mos subvencionuar shihet ngritja e kapaciteteve të reja energjetike.
Sekretari i Odës Ekonomike të Kosovës (OEK), Berat Rukiqi tha për Telegrafi se me gjithë subvencionimet buxhetore dhe kredidhënien buxhetore për investime të mëdha kapitale KEK-u nuk ka arritur ende stabilizim në furnizim. “Ky është një tregues që ne duhet të jemi shumë të shpejtë në ngritjen e kapaciteteve të reja energjetike për shkak se ndërhyrjet në KEK nuk po japin efektin e duhur”, tha Rukiqi.
Sipas tij, në të njëjtën kohe stabiliteti financiar i kësaj kompanie do të arrihet vetëm me privatizim të pjesshëm apo të plotë të kompanisë që do të ndikonte në rritje të performancës dhe të njëjtën kohe zvogëlim të barrës buxhetore që ka buxheti i Kosovës për këtë kompani.
Në anën tjetër, Lumir Abdixhiku nga Instituti “Riinvest” tha për Telegrafi.com se KEK-u në vazhdimësi ka qenë një barrë e rëndë buxhetore për kosovarët. Sipas tij, subvencionimi i kësaj ndërmarrje publike ka qenë domosdoshmëri e kohës, por ai thotë se “është e drejtë të thuhet se kosovarët e paguajnë dy herë energjinë elektrike, një herë nëpërmjet faturave të rregullta dhe herën tjetër nëpërmjet kontributeve tatimore”.
“Privatizimi do të gjeneronte edhe kapacitete të reja prodhuese që do të kishin një sërë efektesh ekonomike, me theks të veçantë rritjen e eksportit dhe përmirësimin e bilancit të rëndë tregtar”, theksoi Abdixhiku.
Ndryshe, KEK-u përballet edhe me borxhe të mëdha. Aktualisht, vlera e borxheve të konsumatorëve është mbi 350 milionë uro. /Telegrafi/