Ekonomisti Erton Bega, ka folur për masat kufizuese të Qeverisë për të parandaluar përhapjen e coronavirusit.
Bega konsideron se në mungesë të aftësive menaxhuese, Qeveria e Kosovës po vepron me ndalesa e kufizime.
“Nëse i krahasojmë rastet aktive për 1 milion banorë me coronavirus me shtetet fqinje, Kosova qëndron më mirë se Maqedonia e Veriut, Mali i Zi dhe Serbia, dhe pak më keq se Shqipëria. Çuditërisht, Qeveria jonë mbyll dhe kufizon veprimtarinë e bizneseve prej orës 19:00 përderisa në shtete tjera fqinje që e kanë gjendjen më të rëndë, kufizimet/ndalesat fillojnë prej orës 22:00”,
“Për paradoks të këtij vendimi për ta rritur frustrimin qytetar, shtetet fqinje kanë miratuar disa paketa ekonomike e Kosova e votoj sot pakon ekonomike me vonesë tepër të madhe”.
“Kjo qeveri po udhëheq në stilin bardh e zi, përkatësisht në mungesë të aftësive menaxhuese të pandemisë ka zgjedhur të veproj me ndalesa dhe kufizime që kanë për bazë paligjshmërinë e disa bizneseve dhe individëve në respekt të masave anticovid. Kur nuk ke ide për menaxhim të situatave, atëherë është më së lehti me ia fut kot duke ndaluar funksionimin e ekonomisë”, thotë ai.
Ai ka folur edhe për Projektligjin për Rimëkëmbje Ekonomike, me ç’rast ka thënë se ky projektligj do të ishte shumë pozitiv po të ishte miratuar disa muaj më herët.
“Në anën tjetër kjo pako ekonomike do të ishte shumë pozitive sikur të ishte miratuar 4-5 muaj më parë, pasi vlera e projektuar financiare atëherë me këtë pako do të shumëfishohej deri tash”.
“Kuvendi i MËDITJEVE e vonoj votimin me muaj të tërë për inate personale/partiake duke i dhënë goditje të madhe ekonomisë dhe zhvlerësoi efektin financiar të pakos ekonomike duke e vonuar në kohë”.
“Kjo Qeveri e Zorit duhet të dorëhiqet sa më parë për t’i hapur rrugë funksionimit të rregullt në Kuvendit dhe shtetit në tërësi”, ka shkruar në fund Bega, njofton Telegrafi.