Rritja ekonomike e Indisë preku nivelin rekord të më shumë se dy viteve, duke u ngjitur në 8.2 për qind gjatë tremujorit të dytë të vitit 2018.
Kryeministri indian Narenda Modi ka qenë vazhdimisht nën presion për të çuar përpara premtimin e tij për reforma dhe hapjen e vendeve të punës për miliona të rinj të papunë dhe siç duket ky është një stimul politik në vitin e fundit të mandatit të tij, përpara zgjedhjeve të tjera.
Prodhimi dhe konsumi privat vlerësohen si lokomotiva e rritjes ekonomike, duke nxitur shpresat se për ekonominë gjigante të Indisë ka filluar kthesa, përcjell Telegrafi.
Leximi i rritjes ekonomike për tremujorin e dytë 2018 rezulton bindshëm mbi pritshmëritë e tregjeve dhe analistëve që flisnin për 7.6 për qind rritje, ndërkohë që kjo shifër është më e larta që prej 2016-së, e cila ishte 9.3 për qind.
Sipas Bankës Botërore, ekonomia indiane ia kaloi Francës, duke i zënë vendin si ekonomia e gjashtë më e madhe në botë. /Telegrafi/