Angelina Eichhorst, drejtoreshë për Evropën Perëndimore, Ballkanin Perëndimor dhe Turqinë, si dhe zëvendësdrejtore menaxhuese në Shërbimin Evropian të Veprimit të Jashtëm (EEAS), ishte në një vizitë dy ditore në Prishtinë për të adresuar zhvillimet e fundit dhe hapat urgjentë të ardhshëm.
Sipas një njoftimi, së bashku me krerët politikë të Kosovës, si nga partitë qeverisëse, ashtu edhe nga opozita, përfaqësuesit e shoqërisë dhe sigurisë, Eichhorst diskutoi për agjendën e integrimit evropian të Kosovës pas adoptimit të Strategjisë së re të Ballkanit Perëndimor të Komisionit dhe në raportet e ardhshme vjetore, përfshirë edhe Kosovën – që pritet të publikohet më 17 prill.
“Njerëzit e Kosovës mund të lexojnë në raport një vlerësim të parë të përparimit të Kosovës në zbatimin e Marrëveshjes së Stabilizim Asociimit dhe Axhendës Evropiane të Reformës. Çështjet e mbështetjes së legjislacionit ndërkombëtar, sundimi i ligjit, drejtësia, transparenca, procesi i rregullt ligjor, gjykimi i drejtë, lufta kundër korrupsionit dhe krimit të organizuar janë elemente të rëndësishme kundër të cilave do të matet progresi. Duke qëndruar të përkushtuar ndaj agjendës së BE-së, si orientim strategjik, Kosova mund të presë përpara bashkëpunimin konstruktiv, efektiv dhe të frytshëm, me BE-në dhe rajonin si tërësi”, ka thënë Eichhorst.
Ajo, siç thuhet më tej, përmendi rëndësinë e votimit të suksesshëm në Kuvend, i cili ratifikoi marrëveshjen e kufirit me Malin e Zi, një hap të gjatë dhe të pritur drejt liberalizimit të vizave.
Ajo gjithashtu përshëndeti punën pozitive mbi legjislacionin e fundit të miratuar në Kuvend.
“Sinjali i funksionimit të institucioneve solide është shumë i nevojshëm, në raste kur ka pyetje, gjithashtu në mesin e popullatës këtu, jo vetëm në Bruksel, dhe kur mençuria, besimi dhe lidershipi janë fundamentale”.
Theks i veçantë i është dhënë dialogut të Beogradit të Beogradit dhe ngjarjeve të fundit në Mitrovicë.
Eichhorst theksoi se çdo mosmarrëveshje midis Beogradit dhe Prishtinës duhet të adresohet dhe zgjidhet në mënyrë paqësore në dhe përmes dialogut dhe theksoi nevojën urgjente për të përshpejtuar zbatimin e marrëveshjeve të arritura.
“Kosova duhet ta zbatojë marrëveshjen për Asociacionin/Komunitetin e komunave me shumicë serbe pa ndonjë vonesë të mëtejshme”, citohet të ketë thënë Eichhorst.
Në këtë drejtim, Eichhorst ka përshëndetur njoftimin e kryeministrit Ramush Haradinaj për fillimin e punës së Ekipit Drejtues.
“Ne do të ftojmë tani kryenegociatorët nga Beogradi dhe Prishtina, ekipet e tyre, si dhe Ekipi Drejtues dhe ekspertët teknikë për diskutime në Bruksel dhe të angazhohen në mënyrë konstruktive dhe me mirëbesim në procesin e hartimit”, tha ajo.
Eichhorst gjithashtu përmendi vonesën në zbatimin e marrëveshjes së energjisë dhe kujton nevojën urgjente për të lejuar që Kosova të jetë pjesë e mekanizmave regjional të transmetimit të energjisë elektrike.
Ajo ka folur edhe rreth arrestimit dhe ekstradimit të kohëve të fundit të gjashtë shtetasve turq në Kosovë.
“Në përputhje me vendosmërinë e Kosovës për të punuar së bashku për një të ardhme të lirë dhe demokratike, siç përcaktohet edhe në MSA, të gjitha veprimet e institucioneve janë të lidhura nga respektimi i plotë i sundimit të ligjit dhe promovimi i respektit universal dhe respektimi i marrëveshjeve ndërkombëtare – rregulla dhe norma edhe kur është fjala për ekstradimin”. /Telegrafi/